Millionilikkaat pineqarput
Kruse Kielsen-ilu nassuiaassapput
Avaleraasartoorniarneq pillugu Aalisarnermut Ataatsimiititaliap Kim Kielsen Karl-Kristian Kruse-lu nukingernartumik siunersuinissamut aggersarpai
Avaleraasartoortassanik agguataarinerup tamanut saqqummiunneqarnerata kingorna Aalisarnermut, Piniarnermut Nunalerinermullu Ataatsimiititaliaq aalisartunit arlalippassuarnit qinnuteqaamminnik itigartinneqarsimasunit saaffigineqartarsimavoq.
– Ingerlasimaneq Naalakkersuisoqarfimmi imminut misissornissamut tunngavissiisariaqartoq ataatsimiititaliaq isumaqarpoq. Aqutsinermi aalajangiinerup taama annertutigisumik oqallisigineqarnera qaqutigoortorujussuuvoq, Inatsisartut Allattoqarfiannit tusagassiorfinnut nalunaarut naapertorlugu ataatsimiititaliap siulittaasua Nikolaj Jeremiassen oqarpoq.
Taamaattumik aalisarnermut ataatsimiititaliaq tallimanngormat aalajangerpoq avaleraasartoorniarneq pillugu nukinginnartumik siunersiuinissamut Naalakkersuisut Siulittaasuat Kim Kielsen aamma Aalisarnermut, Piniarnermut Nunalerinermullu Naalakkersuisoq Karl-Kristian Kruse aggersarneqassasut, tussgassiorfinnut nalunaarummi allassimavoq.
Qinnuteqarnerup ingerlarnga, tassunga ilanngullugit qinnuteqarnissamut killissarititap sivitsorneqarneranut tunngavigineqartoq – aammalu qinnuteqaatit suliarineqarnerannut atatillugu aalajangiinermut tunngavigineqartut, ilaatigut nassuiaateqarfigineqarnissaat ataatsimiititaliamit kissaatigineqarpoq.
Avaleraasartoorniarnerup nunatsinni inuiaqatigiinni suliffissanik pilersitsinissamut inerikkiartortitsinissamullu pingaarnertut atorneqarnissaa pingaaruteqarpoq, ataatsimiititaliamilu amerlanerussuteqartut isumaqarput ilaatigut sukumiisumik suliarinnittoqarsimanngitsoq.
Nikolaj Jeremiassenip, Siumut, saniatigut ataatsimiititaliami ilaasortaapput Michael Rosing, Demokraatit, taannalu siulittaasup tulleraa, Sika K. Frederiksen, Siumut, Siverth K. Heilmann, Atassut, Hans Enoksen, Partii Naleraq, Ane Hansen, IA, aamma Aqqaluaq B. Egede, IA.