Kruse immap uumasuinik atorluaanermut
Karl-Kristian Kruse immap uumasuinik atorluaanissaq pillugu Savalimmiuni ataatsimeersuarnermut sapaatip-akunnerani aggersumi peqataassaaq
Ataatsimeersuarnerup qulequtaraa "Immap uumasuinik atorluaalluni aningaasarsiorsinnaaneq", Namminersorlutik Oqartussat nittartakkaminni paasissutissiipput.
Ataatsimeersuarnerup siunertaraa politikikkut oqaluuserineqassasoq Atlantikup avannaata kangiata Issittullu imartaata immami uumasuinik atorluaalluni qanoq aningaasarsiorluartoqarsinnaanersoq.
Ataatsimeersuarneq immikkoortunut pingasunut avitaavoq: immap uumasuinik atuilluni nunarsuaq tamakkerlugu nunallu immikkoortuini atuineq, aamma taakkuninnga atuilluni periarfissat ineriartortinneqarsinnaasutullu assersuutit, taakkulu periarfissaat kiisalu politikikkut qanoq aaqqiillunilu ineriartortitsisoqarsinnaanersoq.
Ataatsimiissutigineqartussat ilaatigut tassaapput immap sissallu naasuisa ilaat, quajaatit qeqqussallu ilaannik qeqqussanillu naatitsisinnaaneq, aalisakkanik tunisassiorneq saniatigullu pisanik aamma aalisarnermit sinneruttunit atuineq. Pineqartut nakorsaasiornermut, nerisassiornermut aamma nerukkaasiornermut ilaatigut atorneqartarput.
Ataatsimeersuarneq Savalimmiuni aalisarnermut naalakkersuisoqarfiup Nordiske Marine Tænketank suleqatigalugu aaqqissuussaraa.