qaleralinnut akitsuut nutaaq
Kruse Ane Hansenimut: Vittup siunnersuutigaa
– Qaleralinnut akitsuutip isumaqatigiinniutigineqarnerani pinngitsoornanga peqatanissannut pisussaaffeqarsimanngilanga, aalisarnermut naalakkersuisoq oqarpoq
Aningaasanut inatsit tallimanngormat unnukkut akuersissutigineqarpoq, naatsorsuutigineqartutut Inuit Ataqatigiinnit Partii Naleqqamillu taperserneqarani.
Taassuma akuersissutigineqarnissaa sioqqullugu Naalakkersuisut ilaat IA-meersumit Ane Hansenimit isornartorsiorneqarput, aningaasanut inatsisip oqaluuserineqarnerani ulluni kingullerni peqataasarsimannginnerannik.
Aqagussamut piareersarsimavoq
Pingaartumik isornartorsiorpai Karl-Kristian Kruse(S) Kim Kielsenilu (S). Kingorna paasineqarpoq kingulleq napparsimasimasoq.
Maanna aalisarnermut naalakkersuisut illua'tungiliuttup Ane Hansenip oqaasii sakkortuut akissuteqarfigai.
Karl-Kristian Kruse nammineq oqarpoq qaleralinnut akitsuutip aningaasanullu inatsisip Inatsisartuni oqaluuserineqarneranni peqataasimanani, pissutigalugu aalisarnermut aningaasaliissutissatut siunnersuutip, aqaguani oqaluuserineqartussap, oqaluuserineqarnissaanut piareersarsimagami.
Ane Hansenip saassussinera tupaallaatigaa
– Isumaqarpunga Ane Hansenip Naalakkersuisunik saqqummiussinera naleqquttuunngitsoq, tassa nammineq Inatsisartut siulittaasoqarfianni ilaasortaagami, Kruse tusagassiorfinnut nalunaarutikkut oqarpoq.
– Oqaatsit atukkatit tupigusuutigaakka, tassa aalisariarsimasugunngooq aali qaammammut akissarsiaqartitaalluta. Tamanna Naalakkersuisunik isiginerlutsitsilerpoq.
Aalisarnermut Naalakkersuisoq nassuiaavoq isumaqatigiinniarnerni pinngitsoorani najuunnissaminut pisussaaffeqarani, pissutigalugu akitsuutit nutaat Vittus Qujaukitsup akisussaaffigimmagit.
– Ilanngullugu erseqqissassavara Inatsisartuni ataatsimiinnerni peqataasarlunga, naalakkersuisoqarfimmi nukingernartunik suliassaqanngikkaangama, Karl-Kristian Kruse oqarpoq.