Kruse: Aalisarnermut inatsit 2015-mi allannguuteqareersimassaaq

Ukiumi nutaami assigiinngitsorpassuarnik allannguuteqarfiussaaq.

Aalisarnermut, Piniarnermut Nunalerinermullu Naalakkersuisoq Karl-Kristian Kruse, Siumut, nalunaaruteqarpoq. Aalisarnermut inatsip 2015-mi allannguuteqarnissaa oqaatigaa.

Isumaqatigiissummi nutaatut oqaatigineqarsinnaasut tassaapput nunatta avannaani sikusartumi qaammatini siullerni pingasuni qaleralinnik immikkut pisassiisoqartarnissaa, pisassiissutigineqartut avataasigut pisassiisoqartassalluni. Aamma piniarnermut allagartat aalisarnermullu akuersissutit kommuninit isumagineqartalernissaat misissorneqassasoq.

- Maannakkut oqaatigineqarsinnaanngilaq qaammatini pingasuni siullerni sumi, kikkut qanorlu amerlatigisunik immikkut qaleralittassiisoqartarnissaanik, tamatumunngami aalajangertinnani nalilersuisoqartussaassammat. Sikumili qimussimik qaleralinniartarnermut siunertaritinneqartutut oqaatigineqarsinnaavoq, Karl-Kristian Kruse nalunaarpoq.

Allaffissorneq allanngortinniarpaa
Naalakkersuisunngorlaap neriuutigaa piniarnermut allagartat aalisarnermullu akuersissutit qinigaaffik qaangiutsinnagu kommuninit isumagineqalereersimassasut, tassanimi allaffissornerup marloqiusaasumik ingerlanneqarnerata allanngortinneqarusunneranut tunngaviupput.

- Ukiuni arlaqaqisuni oqaluttuarpugut allaffissorneq annikillisarneqartariaqartoq eqaallisarneqartariaqartorlu. Piniarsinnaanermut allagartat aalisarsinnaanermullu akuersissutit kommuninit isumagineqartalerpata, tamanna allaffissornermut annikillisaataasinnaassaaq. Kommunimmi innuttatik qanimut sullillugillu ilisimanerusarpaat.

- Piniarnermut allagartartaarnissamik aalisarsinnaanermulluunniit akuersissummik qinnuteqarsimalluni akuerineqarsimanngitsup kommunimi Namminersorlutilluunniit Oqartussanit suliarineqartarnera sivisoorujussuusinnaasarpoq. Isumaqarpunga taakku kommunimit isumagineqartalerpata pisariinnerulissaqisoq, Karl-Kristian Kruse oqarpoq.

Naalakkersuisuni ilaasortaq erseqqissaavoq Naalakkersuisooqatigiilersut pingaartikkaat aalisakkat nalituunngorteqqaarlugit nunanut allanut tunineqartarnissaat:

- Soorlu qalerallit suliarinagit qeritiinnarlugit nunanut allanut maannakkut tunisassiarineqartarput. Siunertaraarput qalerallit suliareqqaarlugit nalituunngorteqqaarlugillu tunisassiarineqartalernissaat. Siunertallu ilagaat tunisassiorfiit niuertarfinnut toqqaannarnerusumik niuertalernissaat, taamaalilluni taakkununnga iluanaarnarninngorsinnaalissalluni.

Biologit aalisartullu
Naalakkersuisunngorlaat pingaartilluinnagaasa ilagaat uumasoqassutsimik ilisimasallit aamma aalisartut ilisimasaat naligiimmik toqqammavigineqartassasut, pisassiissutissatut siunnersuutit aalajangersaavigineqarnerini.

Aalisarnermut, Piniarnermut Nunalerinermullu Naalakkersuisup neriuutigaa aalisarnermut inatsisit allanngortinneqarsimasoq aappaagu naammassineqarumaartoq.

Naalakkersuisooqatigiilersut isumaqatigiissutaasa aamma ilagaat:

• Imartatta aalisaqassusia paasiniarluaqqissaarneqassasoq. Pinngortitalerifimmut aningaasaliissutigineqartartut amerlineqassasut.
• Tunisassiortut aalisartullu nunarsuarmi niuernermi akigititat naapertorlugit sapinngisamik inissiisoqartassasoq.
• Aalisariutinik nutarsaasoqassasoq. Aalisariutitoqqaminnik nutaanik taarsiisut akuersissutiminnik annaasaqartassanngillat.
• Tunumi aalisarneq siuarsarneqassasoq.
• Neqinik, timmissanik, naatitanik, manninnik imminullu tunisassiorneq siuarsarneqassasoq.
• Nunalerineq pillugu Ataatsimiititaliarsuup innersuussutai piviusunngortinneqassasut.
• Inuussutissalerinermut suliaqarfimmut tunngasunik akisussaaffimmik tigusinissamut sulianik ingerlatsisoqassasoq.