Kruse: Aalisarnermi piniarnermilu nakkutilliineq aaqqissuuteqqinneqassaaq

Aalisarnermut nakkutilliisut, piniarnermut nakkutilliisut, alaatsinaattunut nunnigussinermilu nakkutilliisut, Nuummi ukiumoortumik sisamanngornerup tungaanut ataatsimiinnerini inuit 25-t peqataapput.

Aalisarnermut piniarnermullu Naalakkersuisoq Karl-Kristian Kruse peqataavoq. Aalisarnermi piniarnermilu nakkutilliinerup aaqqissuuteqqinnissaa pilersaarutigaa.

- Nakkutilliineq nutaamik aaqqissuussivigissallugu pilersaarutigaarput. Sumiiffinni unioqqutitsinerpaaffiusutut isigineqarsinnaasuni taamaassorisaniluunniit annerusumik nakkutilliisalernissaq siunnerfigineqarluni, Karl-Kristian Kruse ataatsimeeqataasunut oqarpoq.

Piumasaqaatit
Nakkutilliinerup nutaamik aaqqissuunneqarnissaa piniarnermik nakkutilliisunut, piniarnermut nakkutilliisunut alaatsinaatsunullu eqaannerusumik sulisalernissaannut, suliassanullu suugaluartunut piareersimasuunissaannik piumasaqaateqassaaq.

- Eqaannerusuunissap ilaatigut imarivaa qanorluunniit illit atorfeqaraluaruit, soorlu piniarnermik nakkutilliisutut, aalisarnermik nakkutilliisutut alapernaarsuisutulluunniit sulisuuguit, paasisitsiniaanermi ikiuunnissat naatsorsuutigissavat, imaluunniit piniarnermik aalisarnermillu nakkutilliineq, nunamulluunniit pisanik tulaassinermut aamma nakkutilleeqataanissat, Karl-Kristian Kruse oqarpoq.

Soraarsitsisoqassanngilaq
Karl-Kristian Kruse, ataatsimeeqataasunut 25-it missaanniittunut erseqqissaavoq
soraarsitsisoqassanngimmat.

- Nalinginnaasumilli sulinermi allanngortitsiartuaarnissaq nakkutilliinermilu suliassat tulleriiaarneqarnerisa allannguutaannut piareersimaffigissagaat, Naalakkersuisoq oqarpoq.

Atorfilinnut qunusaarisarneq, timmissat, miluumasut inatsisiliornerillu, tassaapput ukiumoortumik ataatsimeeqataasut oqaluuserisassaasa ilaat.