Kronprinsesse Mary Nuummi ataatsimiinnermik ammaassaaq

Kronprinsesse Mary aamma naalakkersuisoq Martha Lund Olsen, ataatsimiinneq 'Vold i hjemmet - et fælles ansvar' Nuummi aggustip 30-ani ingerlanneqalerpat peqataasut ilagissavaat.

Ataatsimiinnerup ilaqutariit persuttaanermik eqqugaasut sammissavai, tassanilu inuit suliaqartut 170-t sinneqartut Nunatsinni tamaneersut aaqqissuussamut peqataassapput.

Peqataasut ataatsimoorlutik tamanna pillugu isumassarsianik aamma siunnersuutinillu nassaassarsiussapput, aaqqissuisut ilisimatitsipput, qallunaat kalaallillu suleqatigiinnerat Kattunneq.

Arnat inersimasut 62 procetiisa piffissap ilaani persuttarneqarnikuupput. Taamaakkaluartoq angerlasimaffimmi persuttaasarneq oqallisigisaanngitsupilussuuvoq, meeqqanut inersimasunullu persuttaasarneq ilaqutariit isertugaataasa annersarisarpaat.

Taamaattumillu persuttaasarnerup oqallisigineqarnissaa aamma ilaqutariinnik suliaqartut akornanni aaqqissuussamik iliuuseqarnissaq allannguutaasinnaasoq aaqqissuisut isumaqarput.

Ilaqutariinnermut pisortaq peqataasoq
Suliaqartut ilaat peqataasoq tassaavoq, Kommuneqarfik Sermersuumi ilaqutariinnermut pisortaq, Tina Dam. Taassuma ataatsimiinneq oqallitsitsinermik nutaamik pilersitsisoqarnissaa neriuutigaa - naggataatigullu tamatuminnga sammisaqarnerulersitsinermik iliuuseqarnermillu kinguneqarumaartoq.

- Ajornartorsiummut iliuuseqarnerusariaqarpugut. Suliaqartutut uagut akisussaaffitta ilagaat, persuttaanerup qanigisanut ilaqutariinnermut aamma ataasiakkaanut meeqqanullu kingunerisassai oqaluuserinissaasa sapinnginnissai, Tina Dam tusagassiuutinut nalunaarummi oqarpoq.

Meeqqat illersuisuat
Meeqqat illersuisuat Aviâja Egede Lynge aamma ataatsimeersuarnermi peqataassaaq, aammalu ilaqutariinni persuttaaffiusuni suliaqarnermi unammilligassanik oqalliseqarnermi peqataassalluni.

Taanna meeqqanut atugarliortunut ilaqutariinni persuttaasarnerup kingunerisartagaanut annertuunut soorunami ukkataqarpoq, neriuutigaalu ataatsimeersuarneq annerusumik paasititsinermik aamma suliaqartut akornanni aamma ilaqutariit eqqugaasut oqallisilernerannik pilersitseqataasinnaasoq.

Isiginnittariaaseq allanngortariaqartoq
- Angerlarsimaffimmi persuttaasarnerup soqutaanngitsutut isigineqarunnaarnissaa pisariaqartilluinnarparput, kisianni tamatta isigut ammarlugit meeqqat ilaqutariinni angajoqqaap aappaata aappani annersarlugu imaluunniit meeqqat timikkut, tarnikkut imaluunniit kinguaassiutitigut innarlerneqartarnerat iliuuseqarfigisariaqarparput.

- Meeqqanut isiginnittarnerput allanngortittariaqarparput, meeqqanut tusarnaarluta ernumagisatsinnik oqaloqatiginninnissarput tunuarsimaarfiginagu, Nunatsinni sumiikkaluaruttaluunniit, Aviâja Egede Lynge oqarpoq.

Suleqatigiinneq siammasissoq
Kattunneq tassavoq Mary Fonden, Danner, qimarnguiit, Mælkebøttecenteret, Ilaqutariinnermut, Naligiissitaanermut, Isumaginninnermut Inatsisinullu Atuutsitsinermut Naalakkersuisoqarfiup kiisalu OAK Foundation Denmark suleqatigiiffiat.