kajumissutsimik sulisut
KRK-INUA kajumissutsimik sulisunik 36-inik nutaanik ilinniartitsivoq
Inuusuttut inuusuttoqatiminnut sammisassanik pilersitsissapput
Inuusuttut katillugit 36-it Nunatsinni sumiiffinnit assigiinngitsuneersut, ikinngutiminnut sammisassanik pitsaasunik qanoq pilersitsisinnaanerlutik ilinniarpaat.
KRK-INUA tunngaviusumik paasissutissanik Aasianni, Ilulissani, Sisimiuni Nuummilu sungiusartitseqqammerpoq.
Tarnikkut ikiueqqaarneq aamma sammisassaqartitsiniarluni pilersaarusiortarneq
Tunngaviusumik sungiusarnermi sammisat assigiinngitsorpassuupput, soorlu suleqatigiinnermut nukittorsaqatigiitsitsisarnernut, tarnikkut ikiueqqaarnermut kiisalu sammisassaqartitsiniarluni pilersaarusiortarnernut tunngasut.
Tamatuma saniatigut inuusuttut Røde Korsip nunatsinni aamma nunarsuaq tamakkerlugu sullissinera pillugu paasisaqarput.
-Inuusuttut KRK-INUA´ta tunngaviusumik paasissutissiinerani peqataasut oqaaseqaamminni oqaatigaat, sakkussanik tunineqarsimallutik, nammineerlutik inuusoqatiminnik kajuminnertik aallaavigalugu sullissisalerunik, nammineerlutik paasinneriaatsiminnut iliuuseqarnissaminnilu qanoq periuseqarsinaanerminnut iluaqusersuutigissallugillu misigisimallutik, tusagassiuutinut nalunaarummi KRK-INUA allappoq.
Kajumissusillit amerlisarnissaat
Inuusuttunut sammisassiaq KRK-INUA inuusuttut akornanni kajumissuseq tunngavigalugu sullissisartut amerlisarnissaannik anguniagaqarusunnermit pinngortuuvoq.
Inuusuttut tamarmik immikkut piginnaasaqartiterput kajuminnermikkullu piginnaasatik atorluarlugit inuusoqatiminnut iluaqusersuilluarsinnaallutik, KRK-INUA allappoq.