Kristine Operation Dagsværkimut peqataaniarluni Københavnimut nuuppoq

Operation Dagsværk Danmarkimi Kalaallit Nunaat pillugu paasissutissiilluni aallartissaaq sapaatip akunnerata tulliani.

Suliniummi holdit marluussapput, aappaani Kristine Josefsen peqataassaaq. Taanna Operation Dagsværkimi suleqataaniarluni Nuummit Københavnimut nooqqammerpoq, ukiup affaani suleqataassalluni.

- Saqqummiussisarnissaq pissanganarpoq, inunnummi taama amerlatigisunut saqqummiinikuunngisaannarpunga, Kristine Josefsen Sermitsiaq.AG-mut oqarpoq.

Suliffimminit soraartoq

Kristine Josefsen suliniummut peqataaniarluni aalajangeqqammerpoq. Tassami Operation Dagsværkimi suleqataasut Nunatsinniipput upernaaq, paasititsiniaasoqarnissaa pillugu suleqatissarsiorlutik. Suliniut Ungdommens Røde Kors aamma Kalaallit Røde Korsiat (KRK) suleqatigiinneratigut aallartippoq, Kristine Josefsenilu KRK-mi peqataasartuulluni.

- Aperineqareernerma kingorna ulloq ataaseq qaangiuttoq suliniummut peqataaniarlunga aalajangerpunga. Aperineqarnera upperinngeqqaaraluarpara, oqallisigereeratsigu uppernarsivara peqataasussanngorlunga. Café Pascuccimi suliunnaarpunga maanngarlungalu, oqarpoq.

Allanngueqataanissaq

Naak saqqummiinissani pissangagilaaraluarlugu suliniummut peqataanissani qilanaaraa.

- Nunarput sinnerlugu peqataasinnaagama nuannaaqaanga, Kristine Josefsen oqarpoq.

Kalaallit Nunaanni inuusuttuuneq qanoq innersoq pillugu saqqummiisarnissani qilanaaraa, naak pissangalaaraluarluni.

- Kalaallit Nunaanni inuuneq Danmarkimi ilisimaneqarpallaanngilaq, ilisimaneqarnerulernissaa kissaatigaara. Nunanit allanit allaanerunngitsugut oqariartuutigisassavara.

Inuusuttut ajornartorsiutiminnik nammineerlutik aniguisalernissaat anguniarlugu Operation Dagsværk aamma Ungdommens Røde Kors suliniuteqartarput.

Kristina Josefsenip inuusuttoqatini kaammattorniarlugit KRK-mi ilaasortaavoq, ukiuni kingullerni pingasuni suleqataalluni.

- Nammineq kajumissuseq atorlugu sulineq nuannarisorujussuuara, tassami inuusuttoqatikka ikiornissaat periarfissaraara KRK-mi peqataaninni. Uannut aamma iluaqutaasoq paasinikuuara.

Kalaallit Nunaata qimaqqanissaa

Kalaallit inuusuttut suliuteqartalernissaat Operation Dagsværkimit qitiutillugu suliarineqarpoq. Inuusuttut ajornartorsiuteqaraluarlutik ilinniagaqarnertik attatiinnarsinnaanissaat Kristine Josefsenip upperaa.

- Inuusuttut ajornartorsiuteqaraluarlutik ilinniarnertik attatiinnartariaqarpaat, tassami Nunarput ilinniarsimasunik amigaateqarpoq.

Taamaattumik Kristina Josefsenip Operation Dagsværkimiinnini nuannaarutigaa.

- Taamaattoq unamminartoqarsinnaasarpoq. Aatsaammi taama sivisutigisumik ilaquttakka qimaqqassavakka.

- Kisianni suliniummut peqataanissara qilanaaraara, allanngueqataanissarami upperaara.