Kristiansen: Ineqarnermut akiliutit qaffakkaluttuinnartut unammilligassat annersaraat

Ulluni kingullerni ineqarneq pillugu oqallinneq annertuserujussuarsimavoq, saqqummiunneqarmat nuna tamakkerlugu attartortut 398-it kommunip imaluunniit namminersorlutik oqartussat inissiaataannit anisitaalersut - taakkunannga 394-it ineqarnermut akiliummut akiligassaqarnertik pissutigalugu.

Ineqarnermut, sanaartornermut attaveqarnermullu Naalakkersuisoq Knud Kristiansen Tusagassiivimmit apersorneqarluni siunertani anguniakkanilu imatut oqaluttuarai:

– Anguniarpakka inissiat nutaat, nalunaarasuartaatikkut attaveqarnerup annertusarnissaa, Nuummi umiarsualivissuartaassaq, mittarfinnik nutaanik sananissaq, pioreersullu ilaasa tallineqarnissaat, Knud Kristiansen ineqarnermut, sanaartornermut attaveqarnermullu Naalakkersuisunngornermi kingorna qaammatit marluk qaangiuttut oqarpoq.

Ineqarnermut akiliutit tupigusuutigai
Politikerip Atassummeersup nalunngilaa suliassarpassuaqartoq, pingaartumik inissiaqarniarmi.

– Sineriaka tamakkingajallugu ajornartorsiuteqarpugut. Nutarterinissanik kinguaattoorsimavugut, tamannalu illoqarfinni nunaqarfinni nutarteriniarnissamut nutaanillu sanaartornermut equngasumik ataqatigiissitsivoq. Tamanna iliuuseqarfigerusupparput, soorunami aningaasatigut atugassarititaasut iluanni, Knud Kristiansen Tusagassiivimmut oqarpoq, erseqqissarlugulu pingaaruteqartorujussuusoq illua'tungeriit tamarmik qanimut suleqatigiinnissaat, kinguaattoornernik ajornartorsiutinik pilersoqaqqunagu.

Ineqarnermut, sanaartornermut attaveqarnermullu Naalakkersuisup pingaartumik ataaseq tupigusuutigaa:

– Ineqarnermut akiliutit qaffakkaluttuinnarput, nutarterinissanik kinguiaattoorsimagaluarluta. Tamanna ataqatigiinngilaq. Pissusissamisoornerussagaluarpoq nutarterinerit kingorna akit qaffatsinneqartarnissaat. Maannalu inissiat pisoqalisimasut isaterpavut, nutaanik akikitsunillu sananiarluta. Unammilligassaavoq ineqarnermut akliutit attartortunit akilerneqarsinnaanissaat.