Toqusoq

Kristian 'Pablo' Poulsen toquvoq

Tusagassiornermik ilinniarfimmi pisortaasimasoq inuiaqatigiinnilu oqallinnikkut malunnaateqarluartoq Kristian 'Pablo' Poulsen 70-nik ukioqarluni Qaqortumi marlunngormat toquvoq

Kristian 'Pablo'Poulsen
Kristian 'Pablo' Poulsen. Marsip arfineq pingajuanni 1944-mi inuuvoq

Inuiaqatigiinni oqallinnikkut malunnaateqartoq, Kristian ’Pablo’ Poulsen, akornatsinniikkunnaarpoq.

Kommune Kujallermi borgmesteri Jørgen Wæver Johansen Kristian 'Pablo' Poulsen pillugu eqqaaniummik allappoq:

'Kristian Poulsen Qaqortup napparsimaviani marsip ulluisa arfineq-pingajuanni inunngorpoq Ammassivimmilu allisarluni. Poqersuugami Qaqortumi Efterskolemi atuartunngorpoq kingornalu ilaatigut Københavnimi Århusimilu ilinniartooreerluni 70-ikkut qiteqqunneranni tusagassiortutut naammassigami nunatsinni sulilerpoq.

Tamatuma kingorna assigiinngitsorpassuarnik suliaqartarpoq ilaatigut makkuusunik: Nunat inoqqaavisa USA-mi katersuunnerannut peqataavoq ICC-mullu taamaalilluni sorlaleeqqataalluni, Partii Siumut aallarneeqataaffigaa, Sulisartut Partiiat aallerneeqataaffigaa, Tusagassiornermik ilinniarfiup aallarnisarneranut peqataavoq, Atuakkiortut Peqatigiiffianni sivisuumik suleqataasimavoq, inuiaqatigiinni oqalliseqataajuartarpoq, minnerunngitsumillu namminersulernissamik suliniaqatigiiffik Nammineq aallartitseqataaffigaa 2009-imilu nunatta namminersulerneranut taamaalilluni toqqammavileeqataalluni.

Soraarninngornissani tikillugu Namminersornerullutik Oqartussani Qaqortullu Kommuneani nutserisutut sulivoq oqaatsinullu pikkorilluinnartuunini pillugu ilisimaneqarluarluni.

Kristian Poulsen inuuvoq uteriitsoq, taamaanninilu pillugu nuannarinnitserpassuaqarpoq, aammalu qunusuitsuunini oqaasissaminillu noqinneq ajornini oqallisigeqatigisartakkaminit eqqaamaneqaatigilluassavai.
Arlalinnik atuakkiaqarpoq ilaatigullu Amerikap tiguagaanera pillugu sukumeeqisumik misissuereersimalluni atuakkiorsimalluni.

Kingullermik atuagaq Ammassivik, alliartornermi eqqaamasalikkersaarutaasoq, Kelly Berthelsen peqatigalugu allappaa qanittukkullu saqqummersinneqarluni.
Kristian Poulsenip ilaqutai, ikinnguterpassui suleqatigisimasaalu tamaasa qamannga pisumik misiginneqatigaavut.

Ataqqillugu eqqaaneqartarili', Jørgen Wæver Johansen allappoq.

Kristian ’Pablo’ Poulsen 70-nik ukioqarluni toquvoq.

Powered by Labrador CMS