Kristian Jeremiassen politikkiminik allanngueqqippoq

Kristian Jeremiassen Qaasuitsoq Kujallermi ikaarsaariarnermut ataatsimiititaliami Siumut sinnerlugu qinigaaqqammertoq, partiiminngaanniik ilaasortaajunnaarpoq. KNR arfininngormat allappoq.

Kristian ilaatigut Qaasuitsup Kommuniata kommunalbestyrelsia Qasigiannguinut naammattumik iliuuseqarsorinngimmagu Siumumut ilaasortaajunnaarpoq.

Atuaruk: Kristian Jeremiassenip Atassut qimappaa

Kristian Jeremiassen aatsaa politikkikkut taama iliuuseqanngilaq. 2009-mi Inatsisartunut Atassut sinnerlugu qinigaareernermini partiimit ilaasortaajunnaarsimavoq, taamani partii anguniagai annikippallaarneri ilaasortaajunnaarnerminut patsisigitippaa. Siornatigut taanna Partii Naleqqap siulittaasuanut, Hans Enoksenimut, atassuteqarluarnera patsisigalugu partiimut qinigassanngortinnissaa ilimagineqarsimangaluarpoq.

Atuaruk: Avannaani isumaqatigiinnginneq - Ane Hansen borgmesterinnguinnassaaq

Kristian Jeremiassen kommunissami, Siumup ilaasortanut tallimaasunut Enok Sandgreenip isumaqatigiissutaannut akuerinninngitsunut ilaavoq, Ane Hansenimillu borgmesterinngortinneqarnissaanut tapersiilluni.