Qaasuitsup Kommunia
Kristian Jeremiassen: Paaqqinninnersiutit maanna qaffanneqarlik
Paaqqinninnersiutit ukiuni qulingiluani kingullerni allanngorsimannginnerat, Qaasuitsup Kommuniani politikerip Kristian Jeremiassenip naammagittaalliutigaa. Meeqqat sumiginnakkat paarinerini angajoqqaarsiat akilerneqarnerusariaqartut taassuma piumasaraa
Meeqqanut sumiginnakkanut angajoqqaarsiat akilerneqarnerusalernissaannut piffissanngorpoq.
Qaasuitsup Kommuniani kommunalbestyrelsimut ilaasortaq, Kristian Jeremiassen (S), inunnik isumaginninnermut naalakkersuisumut Sara Olsvigimut (IA) ammasumik allagaqarsimasoq isumaqarpoq.
Tassami paaqqinninnersiutit ukiuni qulingiluani kingullerni allanngorsimannginnerat, Kristian Jeremiassenip naammaginngilaa.
Inuuniarnermut aningaasartuutit qaffannikuusut
- Ukiuni kingullerni inuuniutit qaffannikuupput, taamaammaattumik paaqqinninnersiutit naleqqussarneqarnissaat tulluarpoq, taanna ammasumik allakkamini erseqqissaavoq.
Angajoqqaarsiaasartut akilerneqartarnissaat pingaartippaa.
- Angajoqqaarsiat akisussaafferujussuarmik tigusisarput, naleqquttumillu akilertarnissaat maanna pingaaruteqarpoq, taanna Sara Olsvigimut oqarpoq.
Kristian Jeremiassen naapertorlugu paaqqinninnersiutit kingullermi 2008-mi juulip aallaqqaataani allanngortinneqarput.