Kristian Jeremiassen: Nukissiorfiit allanngornerat iluaqutaasinnaavoq

Nukissiorfiit piginneqatigiilluni ingerlatsivinngortinnissaa ajornaquteqanngitsumik ingerlanneqarsinnaasoq, kiisalu assigiimmik akeqartitsinissamut kinguneqartitsissanngitsoq Inatsisartut aalajangiiffigisassaannut apeqquteqartoq Kristian Jeremiassen oqarpoq.

Naalakkersuisut siulittaasuata Aleqa Hammondip tusagassiutinut nalunaaruteqarpoq, Nukissiorfiit piginneqatigiilluni ingerlatsivinngornissaa Naalakkersuisunit eqqarsaatigineqartoq, kiisalu Inatsisartut aalajangiiffigisassaattut siunersuut siullermeerluni martsip 18-ani Inatsisartuni suliarineqassasoq.

Inatsisartunut ilaasortap Kristian Jeremiassenip Nukissiorfiit piginneqatigiilluni ingerlatsivinngussappat landskarsimut pitsaasumik kinguneqassasoq oqarpoq.

- Ukiuni tulliuttuni pingasuni sisamaniluunniit pisortat 3- aamma 400 million koruunit akornanni aningaasaateqarnerulissapput, sanaartugassanummi atugassanik Nukissiorfiit aningaasanik Nunatta Karsia avaqqullugu atorniartalissammata, Kristian Jeremiassen oqarpoq.

Allanik iluaquteqarsinnaasoq aamma nassuiarpaa.

- Nukissiorfiilli aktiaatileqatigiiffinngortinneratigut sinaakkutinik allannguinikkut, Nukissiorfiit ungasinnerusumut pilersaarusiornissamik periarfissaqalissapput, taamaalillunilu ukiuni aalajangersimasuni aningaasaliissutigineqartussat naalakkersuinikkut aalajangerneqartarunnaassallutik, Kristian Jeremiassen oqarpoq.

Nukissiorfiit piginneqatigiinnikkut aqunneqalissagaluarpat ullumikkumiit ajunnginnerusumik ingerlalernissaa naatsorsuutigineqarpoq, Nukissiorfiit kommuneqarfiillu imminnut aamma isumaqatigiissusiorsinnaanngussammata.

- Taamaaliorneq eqaallisaataassaaq, sanaartornissamut pilersaarutit siuartinneqartarnerat kinguartinneqartarnerallu suliamut tunngasumik piviusorsiortumillu tunngaveqarluni aalajangerneqartalissalluni. Piffissamilu aalajangersimasumi pisariaqartitsineq aallaavigalugu aki appasinnerpaaffissaminiittoq atorlugu kiffartuussinermut sinaakkusiineq ingerlanneqassalluni. Assersuutissaqqinnerpaavoq Tele Greenland A/S-ip piginneqatigiilluni ingerlatsivinngortinneqarnera taassumalu kinguneranik akiusut ingerlaavartumik appariartortinneqarsimanerat.

Nukissiorfiit nunatsinni innaallagissatigut, imeqarnikkut kiassarnermillu illoqarfiit 17-t sullinneqarput nunaqarfiillu 53 sullinneqarlutik.