Katersuiniarneq

Kræftimik napparsimasut ikiornissaannut piffissanngorpoq

Kræftimik eqqugaasut ikiorniarlugit katersuiniarnersuaq Nuummi Illorsuarmi Timersortarfimmi tallimanngornermi pissaaq. Aningaasaateqarfik pilersinniarlugu ikinnerpaammik 250.000 koruunit katersorneqartariaqarput

Kræftimik eqqugaasut pisortanit ikiorserneqarsinnaanngitsut Ikualap ikiorniarpai.

Nipilersortorpassuit akitsorterussinerilu pissapput Ikuala nuna tamakkerlugu Nuummi illorsuarmi timersortarfimmi tallimanngornermi katersuinialerpat. Nammineq piumassutsimik sulisut 15-it aningaasaateqarfimmik pilersitsiniarluni katersuiniarnissaq aaqqissuuppaat.

Aningaasaateqarfiliorniat Ikualamik taaguuteqarput tassuuna neriunneq ersersinniarlugu. Aningaasaateqarfissap siunertaraa kræftimik eqqugaasut pisortanit ikiorneqarsinnaanngitsut tapiiffigisarnissaat.

- Aningaasaateqarfimmik pilersitsinissamut piumasaqataavoq minnerpaamik 250.000 koruuninik uninngasuuteqarnissaq tassalu siunissami agguaasarnissami aningaasat 250.000 koruunit sinneraanni taakku agguaanneqarsinnaasassapput, Ikualamiit Anna Karina Madsen Sermitsiaq.AG-mut oqarpoq.

Nuannanneq ingerlaqqissaaq
Timersortarfimmi sceneliortoqassaaq tassanilu suliffeqarfiit inuillu ataasiakkaat tunissutissanik tunniukkiartortarsinnaavaat. Aamma sianerfigineqarsinnaasumi call-centereqassaaq tassani inuit tusaamasat oqaloqatigalugit aningaasat tunniunniakkat nalunaarutigineqarsinnaallutik katersuiniarnermut KNR-TV-kkut aallakaatinneqarnerata nalaani.

Unnuup ingerlanerani nipilersortussarpassuupput tassanilu peqataasussat tamarmik nammineq piumassutsiminnik peqataaniarput.

Nipilersortussat tassaapput: Hinnarik, Anda Uldum, Josef Josefsen & Ida Heinrich, JoSPal-G, Kimmernaq, Pele Møller Band, Kali, Kishima, Qarsoq, Rikka aamma Hans-Peter Bay.

KNR-TV-kkut aallakaatitsineq nalunaaqutaq 23.00 unissaaq. Tamatumali kingorna nuannanneq tusarnaartitsinerlu ingerlaqqissapput unnuakkut nalunaaqutaq 02.00-ip tungaanut.

Powered by Labrador CMS