Kræfti siunissami nappaat toqunartuujunnaarnissaa neriugineqarpoq

USA nuna tassaassaaq kræfrimut peqqissaammik nassaartuusoq.

USA-p præsedentia, Barack Obama, State of the Unionimik oqalugiarnermini taama oqarpoq, nuna tamakkerlugulu kræftimik peqqissaammik nassaarnissamik iliuusissamik saqqummiussilluni.

Kisiannili Kræftens Bekæmpelsemi pisortaaneq Leif Vestergaard Pedersen naapertorlugu, kræftimut peqqissaativimmik nassaartoqarnavianngilaq.

- Kræftimut akiuussutissamik kræfterunnaartitsissutaasumik kinguneqartumik nassaarnissarput ilimaginngilara. Taanna cellet ajoquteqarnerisigut nappaat pinngortartuuvoq. Utoqqaliartortillunilu cellini taamatut ajoquteqalernissaq qaninneruleriartortarpoq, timillu nammineq tamanna aqussinnaanngilaa.

- Kisianni akiuussutissamik amerlanngitsut kræftimik toqquteqartalersillugit, aammalu annertuumik kræfternerup kinguneqartarneri pinngitsoortinnissaanut nassaarsinnaasugut ilimagaara, Ritzauimut taanna oqarpoq.

Atuaruk: Kalaallit kræftimut takutitsissutaat qallunaanit nuannarineqaqaaq

- Aamma kapuutit kræftimut akiuussutissat takoreerpagut. Ukiunilu aggersuni kræftimut akiuussutissanik kapuutinik amerlanerusunik aammalu iluaqutaasinnaanerusunik, kræfti nappaat atugaralugu inuusoqarsinnaalertitsunik takusalernissarput ilimagaara.

Ukiut tamarluinnaasa kræftimut nakorsaatinik siuariartoqartartoq, Leif Vestergaard Pedersenip erseqqissarpaa. Kisianni aamma aningaasaleerusussuseqartoqartoq oqaatigaa.

- USA-mi præsidentip tullia tunuarpat, kræftinut assigiinngitsunut peqqissaammik nassaartoqareerumaarnera ajoraluartumik ilimaginngilara. Kisianni qularinngilara ullumikkornit siuarsimanerujumaartugut.

Aammalu Barack Obama tamanna malunnartinniarnera sunniuteqanngitsoorunnanngilaq, Leif Vestergaard Pedersen isumaqarpoq.

- Amerikamiut præsidentia suliniummik annertuumik iliuuseqaraangat iluaqutaajuaannarpoq. Iliuuseqarnermut ukkassititseqataasarpoq. USA-milu kræftertunut kisimi iluaqutaanani nunarsuarmi tamani iluaqutaassaaq.

Assit takukkit: Kræfti akiorniarlugu sikkilerneq