korea
Koreap suleqatigiinneq pimooruppaa
Koreap aallartitaa Young-sam Ma ataatsimeeqatigereerlugu Vittus Qujaukitsup suleqatigiinneq naammagisimaarluarpaa
– Koreamit pisortatigoortumik tikeraarteqarnerput nuannaarutigaara, nunanut allanut tunngasunut Naalakkersuisut Vittus Qujaukitsoq namminersorlutik oqartussanit tusagassiorfinnut nalunaarutikkut oqarpoq.
– Kalaallit Nunaata Koreallu suleqatigiilluarnerat ukiuni kingullerni ingerlallualersimavoq - pingaartumik 2012-p kingorna. Pingaartumik aalisarnikkut, aatsitassarsiornikkut, ilisimatusarnikkut takornariaqarnikkullu Koreap suleqatigineqarnerata annertusineqarnissaa isumalluarnartoqartorujussuuvoq, Vittus Qujaukitsoq oqarpoq, tusagassiorfinnullu nalunaarummi Sydkorea taagorpaa Korea, taanna nunap pisortatigoortumik aterimmagu. Soorunamili Nordkorea tamatumunnga isumaqataanngilaq.
– Koreap Kalaallit Nunaata Universitetianut, "Korea Corner"-ip Universitetimi ammarneqarneratigut, attuumassuteqarnera takussutissaavoq Koreap illugiilluni suleqatigiinneq pimoorukkaa, kissaatigalugulu Kalaallit Nunaata Koreallu taarseeqatigiittarnernik annertusissagaat, niuernerinnaanngitsukkut aningaasaliinerinnaanngitsukkullu, aammattaarli ilinniartunik aammalu issittumi pissutsinut ilisimasanik annertunerusumik taarseeqatigiittarnikkut, Vittus Qujaukitsoq oqarpoq.
– Koreamik suleqateqarluarnitta ingerlaannarnissaa qulakkeerniartuassavarput, qulakkeerlugulu koreamiut ilisimassagaat Kalaallit Nunaannut tikilluaqqusaallutik. Tassami Koreap aamma Kalaallit Nunaata qanimut suleqatigiinnerat ilimanaateqartorujussuuvoq, Vittus Qujaukitsoq isumaqarpoq.
Koreap aallartitaa Young-sam Ma siullermeersumik Nunatsinnut tikeraarpoq maajip 12-annit 14-iannut.
Tikeraarnissaa Vittus Qujaukitsumit piareersarneqarsimavoq.
Tamatuma saniatigut aallartitap aningaasaqarnermut aatsitassanullu Naalakkersuisoq Anda Uldum, aamma ineqarnermut, sanaartornermut attaveqarnermullu Naalakkersuisoq ataatsimeeqatigai. Aamma inuussutissarsiortunik ataatsimeeqateqarpoq, soorlu Royal Greenlandimik aamma Greenland Holdingimik. Marlunngormat maajip 12-anni Kalaallit Nunaata Universitetiata rektoria Tine Pars ataatsimeeqatigaa.
Ataatsimiittarnerni pingaartinneqarlutik eqqartorneqarput nunat marluk niueqatigiinnerisa peqatigiinnerisalu annertusarnissaat, pingaartumik aatsitassarsiornermi, aalisarnermi, ilisimatusarnermi takornariaqarnermilu, namminersorlutik oqartussat tusagassiorfinnut nalunaarutikkut paasissutissiipput.