Korea avannarleq Japan qulaallugu rakettimik igeriussisoq

Korea avannarleq 2009-p kingorna siullerpaamik Japan qulaallugu rakettimik igeriussivoq. Raketti kilometerit 2700-t ingerlaarpoq.

Korea avannarleq Japanip avannarpasinnerusortaata tungaanut rakettimik igeriussivoq.

Japanimi naalakkersuisut ilisimatitsipput. Korea avannarleq 2009-p kingorna siullerpaamik Japani qulaallugu rakettimik igeriussivoq, nutaarsiassaqartitsivik Reuters taama allaaserisaqarpoq.

Raketti kilometerinik 2700-nik ingerlaarpoq qutsissuserlu 550 kilometerit angusimallugu.

- Korea kujalliup USA-llu pisoq sukumiisumik paasiniaaffigileruttorpaat, illersornissamut qullersaqarfik, nutaarsiassaqartitsivik AFP naapertorlugu, ilisimatitsivoq.

Raketti Cap Erimop kangiani Japanimit qeqertaata Hokkaidop avannarpasinnerusortaani kilometerinik 1180-inik ungasitsigisumit imaanut nakkarpoq.

Japanimiut premierministeriata Shinzo Abep oqaatigaa innuttaasut illersornissaannut sapinngisani tamaat iliuuseqarniarluni. Tamatumunngalu peqatigitillugu Naalagaaffiit Peqatigiit qinnuigai Korea avannarliup rakettinik misileraasarnerata unitsinnissaanut suli kimigiiseqqullugit, Reuters taama allaaserisaqarpoq.

Naalakkersuisut rakettimik igeriussisoqarneranik nalunaaruteqarnerup kinguninngua Japanip avannarpasinnerusuani innuttaasut kajumissaarpaat "qanoq iliornissamut piareersaateqaqqullugit.

Korea avannarleq rakettinik misileraalluni qaammatini kingullerni arlaleriarluni igeriussisaqattaarpoq.

Powered by Labrador CMS