inuit peqqissusaat

Kommunit peqqissuseq sammineruleraat

Nunatsinni kommunit immikkut ittumik suliniuteqarfissanik toqqaapput aamma innuttaasut peqqissusaannik anguniagassanik piviusunngortinneqartussanik

Start, Tele-Post, stafetløb, Aasiaat
Aasianni arpattoqarnerani assi

Innuttaasut 2015-imi peqqissusaat pillugu ataatsimiinnermut atatillugu nunatsinni kommunit tamarmik aamma peqqissutsimut naalakkersuisoq, Doris Jakobsen (S), isumaqatigiissuteqarput innuttaasut peqqissusaannik pitsanngorsaaniarluni suliniarnermik nangitsinissaq pillugu.

Suliniutigineqartussat arlallit pilersaarutaareersut Kommunaqarfik Sermersooq ilisimatitsivoq.

Qanoq pilersaarnermik nalunaarut
Nunatsinni kommunit ataatsimut pilersaarutitut nalunaarutaanni, innuttaasut peqqissusaannik pitsanngorsaaniarluni suliniarneq pillugu isumaqatigiissutip sivitsorneqarnissaanik qulakkeerinninnissamik siunertaqartut, suliniuteqarfigineqartussat aalajangersimasut pillugit aamma innuttaasut peqqissusaat pillugu anguniakkat tikkuarneqareerput, kommuninit piviusunngortinneqartussaallutik.

Peqqissutsimut naalakkersuisoq oqaloqatigiinneq suleqatigiinnerlu aqqutigalugit suliniutinik tapersersueqataassaaq.

Ingerlapput
- Suliniutit amerlanerpaat siunnerfittut isumaqatigiissummiittut Kommuneqarfik Sermersuumit suliniarfigineqarnerat aallartinneqareerput. Nuannaarutigaara borgmesterit aamma Peqqissutsimut Naalakkersuisoq ataatsimoorlutik suliniuterpassuit pitsaasut isumaqatigiissutigimmassuk, isumaqatigiissummi allassimasunut naapertuuttut, borgmesterip sinniisaa siulleq Justus Hansen oqarpoq.

Atuaruk: Kalaallit Nunaanni inuuneq Danmarkimi inuunermit ukiunik arfineq-pingasunik sivikinneruvoq

Immikkoortut sisamat
Siunnerfittut isumaqatigiissut ilaatigut makkuninnga immikkoortoqarpoq:

  • Kalaallit Nunaanni atuarfinni tamani ullut tamaasa nalunaaquttap-akunnera ataaseq timimik aalatitsinermut atugassatut skemami allassimassaaq
  • Paaqqutarineqarfinni, meeraaqqerivinni, meeqqerivinni aamma atuarfinni tamani nerisaqarnermut politikki atuutilersinneqassaaq
  • Meeqqat inuusuttullu hashimik aanngajaarniutinillu allanik atuinerannik pitsaaliuineq ataqatigiinnerusumik ingerlanneqassaaq
  • Timimik aalatitsinermik tapertaasunut, ilaasortaanermut akiliutinut aamma sunngiffimmi sammisassanut peqqinnartunut atortunut atugassanik aningaasaliisoqarsinnaanera aqqutissiuunneqassaaq.

Isumaqatigiissutit
Innuttaasut peqqissusaat pillugu suliniutit pillugit isumaqatigiissutit Peqqissutsimut Naalakkersuisup kommunit suleqatigalugit suliarissavaat, marsimi 2016 suleqatigiinnit tamanit atsiorneqarsinnaasunngorlugit saqqummiutissallugit.

Powered by Labrador CMS