suleqatigiinneq
Kommunit marluk suleqatigiinnissamik isumaqatigiissuteqarput
Qeqqata Kommunia aamma Kommune Kujalleq suliniutitigut arlalitsigut suleqatigiilerput
Kommunit innuttaasunut kiffartuussinerisa pitsanngorsarnissaat. Sulisunik piginnaanngorsaaneq ineriartortitsinerlu, kiisalu inuussutissarsiutitigut ilimanaatilinnik ineriartortitsineq, taamaasilluni inuiaqatigiit agguagassaat annertunerulissammata.
Sammisaqarfinni tamakkunani Qeqqata Kommunia aamma Kommune Kujalleq ukiuni aggersuni suleqatigiissapput. Kommunitd taakkua marluk suleqatigiinnialerput pissutigalugu kommunit suleqatigiinnerisa sammineqaqqilernissaa pingaartikkamikku.
Misilittakkanik taarseeqatigiilluni
Kommunit taakkua marluk pissusissamisoortutut isigaat nunami kommunit minnersaattut - angissutsimikkut inuttussutsimikkullu - suleqatigiinnissartik, misilittakkanik taarseeqatigiittarnissartik kommunillu taakkua marluk ineriartortinnissaat, kommunini marlunni takkunani innuttaasunut iluaqutaasumik.
– Suleqatigiinnissamik isumaqatigiissummi ilaapput suleqatigiinnermi piffissamut sivisuumut anguniagassat aammalu suleqatigiinnikkut suliniutit piviusut, maannakkorpiaq ingerlanneqartussat, kommunit tusagassiorfinnut nalunaarutikkut allapput.
Tamanna peqatigalugu kommunit paasissutissiissutigaat suleqatigiinnissamik isumaqatigiissummi matumani tunngavissaasut isumaqatigiissutit pisariaqartitsinermik aallaaveqarnissaat, taamaasilluni suleqatigiinnerup annertusinissaa ajornannginnerussalluni, taamatuttaarlu annikillisinnissaa ajornannginnerussalluni, kommunit taakkua marluk tamanna kissaatigippassuk.