suliffissaaleqineq ilinniagaqarnerlu

Kommunit aallartisartitsiviat nutaaq pilersinneqassaaq

Kommunit suliffissarsiuussisarfii Piareersarfiillu 2017-imi kattunneqassapput, suliarlu tamanna maanna aallartinneqarpoq

Sulisartoqarnermut, inuussutissarsiornermut, niuernermut nunanullu allanut tunngasunut Naalakkersuisoq Vittus Qujaukitsoq (S)

Kalaallit Nunaanni Naatsorsueqqissaartarfimmit kisitsisit nutaat takutippaat inuusuttut suliffeqanngitsut imaluunniit ilinniakkamik aallartitsisimanngitsut amerliartortut.

Naalakkersuisut neriuutigaat tamakkua ikinnerulerumaartut kommunit najoqqutassiuinermik ingerlataat arlallit kattunneqarpata.

Inuussutissarsiornermut, sulisartoqarnermut, niunernermut nunanullu allanut tunngasunut Naalakkersuisup Vittus Qujaukitsup (S), sapaatip akunnerata matuma naanerani Kangerlussuarmi isumasioqatigiissitsinikkut kommunit suliffeqarnermut, najoqqutassiuinermut piginnaanngorsaanermullu centeriannik nutaamik taaneqartoq aallartisarniarpaa.

2016-imi januaarip aallaqqaataanit inatsit nutaaq atuutilerpoq, tamatumalu kingunerisaanikkommunit maanna suliffissarsiuussisarfii Piareersarfiillu 2017-imi kattunneqassapput, taamaasilluni suliffissaaleqisut inuillu ilinniaqqinnissamik pisariaqartitsisut ingerlatsivimmi ataatsimi najoqqutassiorneqarsinnaalissallutik.

Aaqqissuussineq periutsillu nutaat

Kangerlussuarmi isumasioqatigiinnermi peqataasut suliffeqarnermut, najoqqutassiuinermut piginnaanngorsaanermullu centerimut inatsit nutaaq sammissavaat, taamaasilluni kommunini siunnersortit sulisullu malittarisassat nutaat ilisimalissammatigit.

Politikerip, periutsimut nutaamut akisussaasup, qularutiginngilaa centerit nutaat pioreersunit pitsaanerussasut.

´Sukkanerusumik´

– Centit nutaat kingunerisaannik innuttaasut sukkanerujussuarmik sullissinnaavagut iliuuseqarnissamut pilersaarummik pitsaasumik, tamannalu atorlugu innuttaasut sukkanerusumik sulilersillugit imaluunniit piginnaanngorsartittalerlugit, Vittus Qujaukitsoq isumasioqatigiinnermut atatillugu oqarpoq.

Naalakkersuisut pilersaarutaat naapertorlugu 2016 ukioq ikaarsaariarfiussaa, centerillu nutaat 2017-imi januaarip aallaqqaataani tamakkiisumik kattutereersimassapput.

Powered by Labrador CMS