oqaatsinik oqallisiginninneq

Kommunip qallunaatut oqaaseqartut kisissavai

Politikerip kommunimi sulisut qallunaatut oqaluttut qassiunersut paaserusuppaa

Kommunip atuarfiini ilaatigut qallunaatut oqaaseqartunik sulisoqarpoq. Assi toqqorsivimmit

Qeqqata Kommuniani kommunalbestyrelsemi ilaasortap Siumumeersup Marius Olsenip kommunip allaffeqarfia piumaffigaa, kommunimi sulisut qassit qallunaajunersut paasiumavaa. Tamanna aningaasaqarnermut ataatsimiititaliap kingullermik ataatsimiinnerani imaqarniliami atuarneqarsinnaavoq.

Imaqarniliaq naapertorlugu Marius Olsen mailikkut "Qeqqata kommuniani sulisut amerlassusaat kiisalu qassit qallunaajunerinik allaffeqarfimmut paasissutissanik ujartuilluni saaffiginnippoq."

3 procentit qallunaatut oqaluttut
Allaffeqarfiup ilisimatitsissutigaa, kommunimi sulisut 1.300 missaanniittut, kisianni soraarsitsinerit, akunnermusiallit, ullup affaanik sulisartut, assersuutigalugu piginnaanngorsartut pissutigalugit, kisitsinermi sulisut 1469-iupput.

Taakkunannga 39-t qallunaatut oqaaseqarput.

Kisianni qallunaatut oqaaseqartut tamarmik Danmarkimeersuunngillat, imaqarniliami tamanna aamma atuarneqarsinnaavoq.

Atuaruk: Atassut: Tuluit oqaasiinik pilersaarut kukkunerusinnaavoq akisooq

- Qallunaatut oqaasillit sulisorineqartut tamarmik tikisitaanngitsut, ilaalli ukiuni arlaqartuni Kalaallit Nunaanni najugaqareersimasut, qallunaatullu oqaasillit ilaat kommunimit tikisitaanngitsut, tamanna oqaatigineqarpoq.

Amerleriartut
Kommunimi qallunaatut oqaaseqartunik ukiuni marlunni kisitsisoqarnikuuvoq, 2015-imi aamma 2016-imi. Tassani atuarneqarsinaavoq, sulisut qallunaatut attaveqartartut amerleriarsimapput. Tassani atorfinitsitsinerit tallimat pineqarput.

- Marius Olsenip apeqqutigaa, taakku qanoq atorfeqartinneqarnersut, imaqarniliami tamanna aamma atuarneqarsinnaavoq.

Inussiarnernissamut kajumissaarisoq
Kommunip atorfinitsitsineranut apeqqutinut allaffeqarfiup oqaatigaa, sulisut naapertuuttunik piginnaasaqarnerat tunualiaqutaralugu atorfinitsinneqartartut - oqaaserisaallu apeqqutaatinnagit.

Atuaruk: Nakorsat tikisitat kalaallisut ilinniartassapput

- Sumiiffimmi naammaginartumik piginnaasalimmik nassaartoqarsinnaanngippat, kommunip avataanit, tassa kommuninit allanit imaluunniit Kalaallit Nunaata avataanit pissarsiniartoqartariaqarpoq, imaqarniliami allaqqavoq.

- Taamaattumik kommunimi sulisut pigiinnarniarlugit ilinniartitseqqiisarnissaq kiisalu piginnaasanik ineriartortitsiuarnissaq pingaaruteqarpoq, illuatungaatigullu kommunimi piginnaasanik amigaateqarfigisatsinni allatut oqaasilinnut aamma ammasariaqarlutalu inussiarnersuusariaqarpugut, qullersaqarfik naqissusiivoq.

Tassani aamma atuarneqarsinnaavoq, kommunip allaffeqarfiani sulisut 141-uusut, sulisullu qallunaatut oqaaseqartut ilaatigut kommunip atuarfiini ilinniartitsisuusut.

Powered by Labrador CMS