Suliffissaaleqisut
Kommunini allani suliffissaaleqisut Sermersuumut nutserarput
Sermersuumi suliffissaaleqisut arfiniliugaangata ataaseq ukiut kingulliit ingerlaneranni kommunimut nuussimasuuvoq. Taamaakkaluartoq suliffissaaleqinerup akiornissaanut kommuni aningaasanik ikinnerpaanik pisarpoq
Kommuneqarfik Sermersuumi suliffissaaleqisut arfinilerarterutaat, tassa 15,6 procentii, ukiuni kingullerni kommunimut nuussimasuupput.
Tassa imaappoq kommuninit allanit pingasunit suliffissaaleqisut 200-t sinneqartut siorna kommunimut nuussimapput. Tamanna takuneqarsinnaavoq kommunip novembarimi misissuineranit.
Tamannalu suliffissaaleqinerup akiornissaanut namminersorlutik oqartussat aningaasaliissutaanit kommunip annikinnerusumik tunineqartarneranut maluginiagassaavoq, borgmester Asii Chemnitz Narup, Inuit Ataqatigiit, isumaqarpoq.
Suliffissaaleqinerup akiornissaanut kommunit allat suliffissaaleqisumut ataatsimut agguaqatigiissillugu 37.000 koruuninik tunineqartartut Sermersooq 24.000 koruuniinnarnik tunineqartarpoq.
Kisitsisini taakkunani nunaqarfinnut immikkut aningaasaliissutit ilaanngillat.
– Naapertuuppasinngilluinnarpoq Naalakkersuisut naatsorsuutigimmassuk kommunitsinni suliffissaaleqineq akiorneqarsinnaasoq aningaasat ikinnerusut atorlugit, tamanna peqatigalugu kisitsisitigut takussutissat takutimmassuk ukiut tamaasa suliffissaaleqisorpassuit kommuninit allanit kommunitsinnut nuuttartut, Asii Chemnitz Narup oqarpoq.
Tamanna peqatigalugu tikkuarpaa kommuninit allanit nutserartut aamma kommunimi isumaginninnikkut aningaasartuutit allat tatigaat, minnerunngitsumik Nuummi inissaaleqinerujussuaqareermat.