kommunip avinnera
Kommunimi sulisut aalajangiuffigineqalertut
Qaasuitsup Kommuniani sulisut, ukiumi nutaami kommuni avinneqarnerani Avannaata Kommunia Kommune Qeqertalillu pilersinneqarpata, sumi sulissanerlutik aqagu nalunaarfigineqassapput.
Ilaqutariippassuit piffissami matumani siunissaat eqqartorneqarput.
Ilulissani najugaqaannassappat Aasiannulluunniit nuunneqassappat. Apeqqut tamanna avannaata kommunia malunngorlugu avinniarneranut kingunerisaanik aalajangiineruvoq.
Qaasuitsup Kommuniani aqutsisut ullumi kommunimi suleqatigiinnermut ataatsimiititaliaq paasitissavaa kommunimi sulisut siunissami sumi sulisinnaanerat pillugu.
Qaasuitsup Kommuniani borgmester Ole Dorphip, sulisut qanoq agguarneqarnissaat sulisitsisuinit toqqaannartumik paasisaqartigani oqaaseqarfigerusunngilaa.
- Sulisut aqagu nalunaarfigineqarnissaat naatorsorsuutigaarput, Ole Dorph Sermitsiaq.AG-mut oqarpoq.
Qaasuitsup Kommuniani sulisut ukiumi nutaamiit kommuni avinneqarpat, sumi sulerusunnerunersut aperineqarsimapput. Kissaataalli piviusunngortinneqassanersoq ilisimaneqanngilaq.
Sulisut siunissaat septemberimilu inissinneqareersimanissaat pilersaarutaasimangaluarpoq. Qularneq utaqqinerlu kiisami tamaanga killippoq.
- Sulineq naatsorsuutigisamit ingerlanneqarneranut pissutaavoq , kommuninngortussani marlunni sulisut qanoq amerlatigisut pisariaqartinneqarnersut aallaavigalugit aaqqissuussinermut pilersaarusiortoqarnissaa, Ole Dorph paasissutissiivoq.