Kommunimi politikerit illoqarfinni ukunani mittarfinnik kissaateqarpoq

Qasigiannguani, Qeqertarsuarmi aamma Kangaatsiami mittarfiliortoqarli.

Qaasuitsup Kommuniani kommunalbestyrelsimut ilaasortaq, Kristian Jeremiassen (S), apriilip sisamaani kommunimut qinersinermi qinigassanngortinnini saqqummiutiutigalugu taama oqarpoq.

- Kommuni nutaaq inuussutissarsiornikku ineriartussappat, illoqarfinni taakkunani pingasuni mittarfiliornissaq pisariaqarpoq, Kristian Jeremiassen oqarpoq.

Atuaruk: Jeremiassen: Qasigiannguani innuttaasunik ataatsimiititsisoqarli

Ineriartortoqanngitsoq
Januaarip aallaqqaataani 2018-imi Qaasuitsoq avinneqassaaq. Avanaani kommuni tassaalissaaq Ilulissat, Upernavik, Uummannaq aamma Qaanaaq, aappaalu Qasigiannguit, Qeqertarsuaq, Aasiaat aamma Kangaatsiaq.

- Pilersaarusiorneq aningaasaliinerlu Naalakkersuisut, kommuni nutaaq aamma Kalaallit Airports qanimut suleqatigalugit pisariaqarpoq. Qasigiannguani, Qeqertarsuarmi Kangaatsiamilu ineriartortoqanngilaq, illoqarfiillu taakku mittarfeqannginnamik tikikkuminaapput, Kristian Jeremiassen, ukiuni 16-ini kingullerni kommunalbestyrelsimut ilaasortaasimasoq oqarpoq.

Atuaruk: Siumumi politikkerip naalakkersuisumik tunuartitsineq nuannaarutigigaa

Innuttaasut takornariallu iluaqutigissagaat
Qulimiguulinnik angallanneq akisuallaartoq taassuma oqaatigaa.

- Siunissamimi timmisartuaqqat atorunnaarneqartussaapput, massakkullu tapiissuterpassuit atorneqarput timmisartuaqqanik angallassinermi. Suluusalinnut mittarfiliortiternerit siunissamut aningaasaliinerupput ileqqaarnerullunilu, innuttaasunut takornarianullu iluaqutaaginnartussaapput, Kristian Jeremiassen oqarpoq.

Atuaruk: Angallannermut isumaqatigiissutinut nutaanut isornartorsiuineq tunngaveqannginneraraa