peqquserlunnermut akiuineq
Kommuni peqquserluttuliortoqannginnissamut suliniuteqartoq
Peqquserluttuliortoqannginnissaa imaluunnit pinaveersaartitsinissamut Kommuneqarfik Sermersuumi sulisut qitiusut pikkorissartinneqassapput.
Illoqarfiit pingaarnersaanni tusagassiuutinut nalunaarummi tamanna atuarneqarsinnaavoq, tassani borgmester Asii Chemnitz Narupip Transparency International Litauenip pisortaa, Sergejus Muravjovas aamma Transparency International Greenlandip (TIG-ip) siulittaasua, Anita Hoffer aamma TIG-imi atorfilik Bodil Karlshøj ullumi ataatsimeeqatigalugit oqaluuserisimavaat.
Assigiissuterpassuit
- Litauenimi sulineq qanoq ingerlanneqarnersoq tusarlugu soqutiginarpoq. Litauenimi Nunatsinnilu unammilligassat assigiinngitsorujussuugaluartut taamaattoq ilaatigut assigiinnik unammilligassaqartugut paasinarpoq, ataatsimeereernerup kingorna borgmester Asii Chemnitz Narup oqaluttuarpoq imalu nangilluni oqarluni:
- Kommuneqarfik Sermersuumi suliffeqarfitta aningaasarsiutigalugu siulersuisussaannik toqqaanissaq suliaralugu qanittukkut aallartipparput. Tamannarpiarlu Litauenimi aamma ukkatarineqarluarmat tamanna pillugu oqaloqatigiinnerput pitsaalluinnarlunilu pissarsiaqaataavoq.
Atuagaq najoqqutassaq
Kommunimi sulisut ammasumik aqutsinissaat aamma peqquserluttuliunnginnissaat pillugit atuagaq najoqqutassaq Transparency Inaternational Greenlandimit suliarineqarpoq, taanna upernaap ingerlanerani saqqummersinneqassalluni.
- Atuakkap najoqqutassap qanoq imaqarnissaa Kommuneqarfik Sermersuumit peqataaffigaarput. Taanna sulisorpassuatsinnut pingaaruteqarluartumik sakkuusinnaavoq, tassami kommuniussagatta tatigineqarsinnaasoq. Taamaattumik atuakkap saqqummersinneqarnissaa qilanaaraara aamma qilanaaralugu Transparency Inaternational Greenlandip suleqatigilluarneqarnissaa, Asii Chemnitz Narup ilisimatitsivoq.