namminiilertut
Kommuni 15 millioninik nalilimmik ATV-nut aqquserniulertoq
2017-imiit sisamanik assakaasulinnik nunakkoorutaasinnaasunik Sisimiut Kangerlussuullu akornatigut ingerlaneq ajornannginnerulissaaq
Piffissami matumani Qeqqani innuttaasunut suli nutaarsiassatsialaqarpoq.
Sisimiuni Maniitsumilu nutaanik aalisakkeriveqarpoq, canadamiut Hudson Ressources aatsitassanik piiaaffiliorniarlutik pilersaarusiorput, aammalu kommunip umiarsuarnik takornariartaatinik tikittoqarnerusalertoq malugaa.
Maannalu aamma kommunimi politikerit angallanneq pitsaanerulersinniarlugu isumaqatigiipput.
Kangerlussuarmut aqqusiulertut
Kommunalbestyrelsemi ataatsimiinnermi kingullermi amerlanerussuteqartut kommunimi ATV-inik ingerlaffiusinnaasunik aqquserniortoqassasoq, Sisimiunit Kangerlussuarmut aqqut ilanngullugu akuerineqarpoq.
Suliniummut tassunga 2016-imi 5 millionit koruuninik aamma 2017-imi 10 millionit koruuninik aningaasiliisoqassaaq. Kommunip suliamik allaatigineqarnera naapertorlugu, ATV-inut aqqutissaq aqquserniornissamut kissaatigisamut aallarniutaasoq.
Ikiorneqaratik
Juulip qaammataani kommuni sioqqanik aqquserniornissamut aningaasanik qinnuteqarnermini angallannermut naalakkersuisumit, Knud Kristiansenimit (A) itigartinneqarpoq. Aqqusinersuaq biilinik marlunnik sanileeriilluni ingerlaffigineqarsinnaasoq 3-500 millionit koruuninik akeqassangatinneqarpoq.
Atuaruk: Aqqusinniortoqassanersoq paaserusunneqartoq
Atuaruk: Bussinik Kangerlussuarmut
Maanna qeqqani kommuni nammineq suliniuteqalerpoq, aqqusinermillu meterinik pingasunik silissusilimmik sanalerluni.
Aamma Maniitsumit
Mittarfiup tungaanut aqqutip saniatigut, piffimmi turistinut illuaraatilinnut ikiuutaasussamik kommunalbestyrelsi 2 millionit koruuninik illikartitsivoq, 2017-imi ATV-inut Maniitsumit Apussuarnut sisorartarfimmut aqqusiortoqarnissaanut atugassanik.
Aamma 1 millionit koruunit aappaagumut ATV-t aqqutaannik sanasoqarnissaanut avatangiisinik misissuinissamut aningaasaliisoqarpoq.
Kommunip nittartagaani ATV-nut aqqusiornissaq suliniut pillugu paasissutissat atuarneqarsinnaapput.
Qeqqata.gl: Kangerlussuarmut aqqusinniassaq takuuk