Kommuneqarfinni kikkut pissaaneqarnerulersut takukkit

IA-p Kommuneqarfik Sermersuumi borgmesteriutitaa Asii Chemnitz Narup illoqarfiit pingaarnersaanni ingerlaqqissaaq. 2259-init taaguunneqarluni qinersinermi ajugaallualaavippoq taamaasilluni qinigaaffiit pingajussaanik borgmesterinngorsinnaalerluni.

Atuaruk: Asii inorsartitsisoq

Taamaasilluni Siumup qinigassanngortitaata Martha Lund Olsenip, Asiip borgmesterimit uppisitseriaraluarnera iluatsinngitsoorpoq. Taamaakkaluartoq Martha Lund Olsen kommunalbestyrelsemut ilaasortanngorpoq. Martha Lund Olsenip Inatsisartuni suliinnassalluni paasissutissiaraa neriuutigalugulu kommuneqarfimmi isumaginnittoqarfimmi sunniuteqarsinnaassalluni.

Kommune Kujalleq

Kommune Kujallermi Kiista P. Isaksen, Siumut, tupaallaatigineqarpaavoq. Kiistap, borgmester Jørgen Wæver Johansen taaguunneqarpaatut qaangerpaa. Kiista P. Isaksen 450-nik taaguunneqarpoq Jørgen Wæver Johansenilu 'taamaallaat' 265-nik taaguunneqarluni.

Atuaruk: Kommune Kujallermi tupaallatsitsisoq

Taamaasilluni Teknikkimut, Avatangiisinut, Meeqqanut Kulturimullu Ataatsimiititaliami siulittaasoq borgmesterinngorsinnaalerluni. Qinersinerup aallartinnginnerani ilimagineqarsimangaluarpoq siumukkormiut Jørgen Wæver Johansenip Simon Simonsenillu unamminissaat, taakku qinisisaat 15-niinnarnik nikingapput. Ukiormanna qinersinermi Simon Simonsen 210-nik taaguunneqarpoq.

Qeqqata Kommunia

Qeqqata Kommuniani Malik Berthelsen (S), Sisimiuni taajuunneqarnerpaavoq, taamaasillunilu borgmesterinngorsinnaalerluni.

Atuaruk: Malik Berthelsen Sisimiuni qinerneqarnerpaavoq

Malik Berthelsenip, Hermann Berthelsen qinigassanngorteqqinngitsoq issiaviani taarserpaa.

Qaasuitsoq Kujalleq

Qaasuitsoq Kujallermi Ane Hansen (IA) borgmesterinngussaaq.

Atuaruk: Ane Hansen qinerneqarnerpaavoq

Aasianni Peter Olsen (IA), Ane Hansenimit taaguunneqarnerpaasimangaluarpoq, Ane Hansenilu illoqarfinni allani taaguunneqarpaasimavoq.

Qaasuitsoq Avannarleq

Ukiumi nutaami kina Qaasuitsoq Avannarlermi borgmesterinngussanersoq aatsaat pingasunngornermi aalagangerneqassaaq. Siumut kisermaassilluni pissaanermik tigummiarsinnaannginnini pissutigalugu partiinik allanik suleqateqartariaqarpoq. Isumaqatiginninniarnerillu sivisusinnaasarmata eqqoriaruminaappoq qaqugu qinersisartut paasissaneraat kina borgmesterinngorumaarnersoq. Qularnanngilarli Siumuminngaanniissammat.

Atuaruk: Qaasuitsoq Avannarleq: Suli pissanganartorsiortut

Nuna tamakkerlugu inernerit

Kommuninut qinersinerni IA 4,6 procentimik siuariarpoq, Siumut qinersisartuminik annaasaqarluni 6,0 procentimik kinguariartoq. Demokraatit 1,8 procentimik siuariarput, Atassut 1,1 procentimik. Kommuninut qinersinermi pernaammik Partii Naleraq qineqqusaartitsivoq nunalu tamakkerlugu 4,6 procentimik qinerneqarsimalluni. Procentit 2013-imi kommuninut qinersinernut sanilliunneqarput.

Atuaruk: IA ajungaarujussuartoq – Siumut ajorsarujussuarluni