Kommuneqarfik Sermersooq sukannersumik nakkutigineqalersoq

Kommuneqarfik Sermersooq sukannersumik siunissami nakkutigineqalissaaq. Taama Aningaasaqarnermut Nunamullu imminermut pissutsinut Naalakkersuisoqarfimmit kommuni nalunaarfigineqarpoq.

Tamatuma kingunerissavaa, isumaqatigiissuteqartoqanissaata tungaanut Nakkutilliisoqarfimmut qaammatikkaartumik oqimaaqatigiissitsinermit naatsorsuutinik nassiussisoqartarnissaa.

Kommuneqarfik Sermersooq nalunaarpoq.

Karsimiittuutigineqartut naatsorsuinerillu
Tamatumunnga tunngaviuvoq decembarip 31-ianni 2012-imi naatsorsuinermi Kommuneqarfik Sermersuup karsimiittuutaasa 23 millioner koruuninut naatsorsorneqarsimanerat.

- Kisianni kisitsit taanna uungaaraannarmut tunngavoq, aningaasat amerlassusaatigut takuneqarsinnaammat piffissami sivikitsuinnarmi annertuunik nikeriartoqartarnera. Taamaattumik karsimiittuutigineqartut ukiup ingerlanerani agguaqatigiissinneqarnissaat eqqornerpaavoq. Tassani takuneqarsinnaavoq, Kommuneqarfik Sermersuup 2013-imi karsimiittuutai agguaqatigiissillugu 108 millioner koruunit missaannik amerlassuseqarsimasut, oqaatigineqareersutut 23 millioner koruuniunatik, Kommuneqarfik Sermersuumi pisortaaneq Steffen Ulrich-Lynge tusagassiutinut nalunaarummi oqarpoq.

Assersuutigalugu Kommuneqarfik Sermersuumi 2011-imi karsimiittuutit agguaqatigiissinneranni 119 million koruunit missaanniissimapput, 2012-imi 113 million koruunit, 2013-imilu 108 million koruunit.

- Taamaattumik takuneqarsinnaavoq, karsimiittuutigineqartut ukiuni pingasuni kingullerni 5 millioner koruunik ikiliartorsimasut, Steffen Ulrich-Lynge oqarpoq.

- Tamatumunnga peqqutaasut ilagivasat, 2013-imi naatsorsuutinut allanneqarsimasut ilaannik aaqqiissuteqarnissami immikkut ittumik torersaasoqartariaqarsimaneq. Taamaattorli torersaasariaqarsimaneq kommunit kattussuunneqarmatali ingerlaavartumik pisariaqarsimavoq, kisiannili 2013-imi suliniarneq immikkut sakkortusineqartariaqarsimavoq.

Isertitat aningaasartuutillu amerlanerusugut
Kommuneqarfik Sermersuumi pisortaqatigiit Naalakkersuisoqarfimmik suleqateqarnertik aallartissimavaat, oqimaaqatigiissaarinermi naatsorsugassat ingerlaavartumik malitseqartinneqartarnissaannut tunngatillugu. Tamatuma saniatigut tigussaasumik makku pillugit suleqatigiinnissamik aallartitsisoqassaaq: Ataatsimoorluni pisiniartarneq paasissutissanillu ingerlatitseqatigiittarneq. Suliniutit tamakkua illuatungeriinnut sipaarutaalersussaapput.

Pisortaaneq: Nakkaattuulivinngilagut
- Kommuneqarfik Sermersuumi sipaartariaqarnerput qularutissaanngilaq. Nakkaattuulivinngilagut, kisiannili ukiuni arlalinni isertitarisinnaasatsinnit aningaasanik amerlanerusunik atuinerusariaqarsimavugut. Taamatut nikeriartoqarnera illuanut saatissavarput, Kommuneqarfik Sermersuumi pisortaaneq oqarpoq.

- Ingerlatsinermut missingersuutitsinni aningaasartuutivut ikilisarniarlugit aallartilluareerpugut.
Kommunimi ingerlatsiviit tamarmik peqataasariaqarput, kisianni uatsinnut pingaartuuvoq, sipaaruteqarniarnerit annikinnerpaamik innuttaasunut tutsinneqassanngitsut, Steffen Ulrich-Lynge oqarpoq.