nalimmassaaneq

Kommuneqarfik Sermersooq mianersortumik missingersuusiorniarpoq

Naligiissaarinissamik iluarsartuusseqqinneq kinguartinneqarpoq, kisianni Kommuneqarfik Sermersooq mianersortumik 2015-mut missingersuusiorniarpoq

Kommuneqarfik Sermersuumi borgmesteri, Asii Chemnitz Narup, Inuit Ataqatigiit

Ippassaq Namminersorlutik Oqartussat tusagassiorfinnut nalunaarumminni nalunaarutigaat utaqqiisaasumik aaqqissuusseqqinnermi iluarsartuussineq kinguartinneqartoq, novembarip 28-iani qinersinerup kingornanut.

Taamatut nalunaaruteqartoqarneratigut inuit attaveqaqatigiittarfiini taamak sakkortutigisumik soraarsitsiortortoqarnissaraluata unitsinneqarnissaanik neriuuteqalersitsivoq. Kisiannili Nuummi Kommuneqarfiup Allaffiani soraarsitsiortortoqarnissaanik unitsitsiinnartoqarusukkaluartoq, tamanna pisinnaanngilaq.

- Aappaagumut missingersuutissatsinni 57 millioner koruunit amigaatigaavut. 54 millionit Naalakkersuisut tiguaat. Taakku utertinneqarnissaat qulakkeertinnagit atorsinnaanngilagut. Tamanna akisussaanngitsuliornerussaaq, Asii Chemnitz Narup oqarpoq.

Namminersorlutik Oqartussat tusagassiorfinnut nalunaarutaanni naqissuserneqarpoq, kinguartitsineq utaqqiisaaginnartoq, aammalu isumaqatigiissutip isumaqatiginninniutigeqqinneqarnissaanut periarfissaq piviusorsiunngitsoq. Borgmesterilu periarfissaq piviusorsiunngitsoq tunngavigalugu iliuuseqarnianngilaq.

- 54 millioner koruuninik ilanngaasoqarnissaa tunngavigalugu missingersuusiortariaqarpugut. Tassatuaavoq akisussaassusilimmik iliuuseqarneq. Piumasaqaat upernaamut tusarliunneqassappat, uagullu piareersimaffiginagu, kommune ajornartorsiorujussualersinnaavoq, Asii Chemnitz Narup oqarpoq, oqaatigaalu 2015-mut mianersortumik missingersuusiussallutik.

Qinersinissap kingorna
- Kommunimit nalunaarutigineqartareerpoq 75-nik soraarsitsisoqassasoq, tamanna allanngortinneqassanngila?

- Aappaagumut 57 million koruuninik amigaateqassaagut. Naalakkersuisunit 54 million koruuninik arsaarneqarpugut, tamannalu akisussaaffigaat. Naluarput suli aningaasat taakku tigoqqissanerlugit, taamaattumik allatut iliorsinnaanngilagut. Qinersisoqareerpat susoqassanersoq naluarput, taamaattumik ikilisaanivut attatiinnartariaqarpavut, Asii Chemnitz Narup oqarpoq.

Powered by Labrador CMS