assit takukkit
Kommunefogedit marluk nersorneqartut
Nunaqarfinnit marlunnit kommunefogedit ukiuni 25-ni sulinerminnut nersornaaserneqartut
Edvard Immanuelsen, Kangersuatsiameersoq, Isak Christensenilu, Upernavik Kujallermeersoq, kommunefogeditut ukiuni 25-ni aalajaallutik sulisimanertik pillugu nersorniarneqarput.
Tamannalu pillugu Kalaallit Nunaanni Politiit aqutsisuinit aallartitanit diplominnatinneqarput.
Kommunefogeditut sulineq unammilligassarpassuaqarsinnaasoq, nersorniarneqartut nersorniarneqarnerminni namminneq oqaatigaat, ilaqutariinnullu aamma sunniuteqarsinnaasoq oqaatigalug.
Ilinniarfeqalilersoq
Qaasuitsumi politiit pisortaata Preben Westhip, politiit sulisuinik ukkasisoqalernissaa oqalugiarnermini erseqqissaatigaa.
- Nunatsinni tamaneersunik kommunefogedinut ataatsimut ilinniarnermik pitsaanerusumik eqqussinikkut tamanna pissaaq, soorlu aamma ukiut marluk matuma siorna kommunefogedinut tamanut akissarsianik malunnaatilimmik qaffaavugut, Preben Westh oqalugiarnermini ilaatigut oqarpoq.
Sulisut piareersarnerullugit
Nalliuttorsiortoq Jørgen Isak Christensen aamma Kalaallit Nunaanni kommunefogedit peqatigiiffianni siulittaasuuvoq, nalliuttorsiornermut atatillugu ilinniagaq nutaaq pillugu Nunatsinni politiit pisortaat, Lars Kirkegaard, diplominnatsitsinerup kingorna paasiniaaffigaa.
- Kommunefogedit siulittaasuallu ilinniagaq nutaaq oqaloqatigiissutigaarput, taassumalu kommunefogedinut tamanut ilinniarnissamik - pisariaqartumik - pilersitsilernerput nuannaarutigaa.
- Taamaalilluta suliamut pingaarutilimmut kommunefogedit piareersarnerunissaat neriuutigaarput, Kalaallit Nunaannilu innuttaasut tatigissagaat, Lars Kirkegaard oqarpoq.