kommuni nutaaq

Kommune Qeqertalik missingersuusiani siulleq naammassivaa

Ikaarsaariarnermut ataatsimiititaliaq isumaqatigiilluni, Kommune Qeqertalimmi 2018-imut missingersuut akueraat.

Ane Hansen, IA, stemmer, folketingsvalg 2015, Aasiaat

Ingerlatsinermut aningaasartuutit 493 million koruunit, sanaartornermut aningaasartuutit 51 million koruunit, isertitat 560 million koruunit, taamaasillunilu 16 million koruuninik sinneqartooruteqarneq. Tassa kommuninngortussap Kommune Qeqertalik ukiup tullianimut missingersuusiai taama isikkoqarput.

Ataatsimiititaliaq isumaqatigiittoq

Ataatsimiititaliaq isumaqatigiilluni missingersuut akueraat.

- Inoqarfinni tamani innuttaasut pisariaqartitaat kissaataallu aallaavigalugit ineriartitsisoqassasoq kommunip nutaap takorluugaraa - politikeritullu akisussaassusilittut kommunitsinni innuttaasut inuussutissarsiuteqartullu atugarisaannik qulakkeerinniffiginissaat suliassaraarput, borgmesterinngortussaq Ane Hansen (IA) tusagassiuutinut nalunaarummi allappoq.

- Kommunip qanoq ingerlanneqarnissaanik inatsisit malittarisassallu amerlasuut sinaakkutassiisuupput – taamaattorli najugaqarfinni ataasiakkaani innuttaasut tusarnaarlugit pisariaqartitaallu aallaavigalugit sinaakkutit taakkua iluini suliaqartassaagut.

Sullisseriaaseq nutaanerusoq

Ane Hansenip (IA) oqaatigereersimasaatut, kommunimi sullisseriaaseq, pissutsinut tullarsagaanerusumik pilersitserusuppoq.

- Aaqqissuussaaneq kalaallit kulturiannik aallaaveqarnerusoq aamma Kalaallit Nunaanni pissutsinut tulluarsagaq pilersinniarparput, taanna allappoq.

Borgmesterip ilanngullugu erseqqissarpaa, Qeqertalik Qaasuitsup Kommunianit qanoq amerlatigisunik 'kingornussassaqarnera' suli qularnartoqartoq, kommunillu aaqqissuussaanera suli ilusilersorneqarluni. Taamaammat missingersuutip naleqqussaqqinneqarsinnaanera pisinnaasoq, taassuma ilimagaa.

- Taamaattumik aningaasaqarnerput malinnaavigeqqissaassavarput pisariaqassappallu missigersuutit killiffissiornerani siullermi april-ip/maj-ip qaammataani 2018-imi missingersuutit naleqqussarsinnaanerat sillimaffigaarput.

Powered by Labrador CMS