Friday, September 8, 2017 - 10:23

Kommune Qeqertalik Kanukokamut ilanngunnissaminut nangaavoq

Kommuni Kanukokamut ilaasortanngussaguni, akiliutigisaminut tamakkiisumik pissarsissanersoq, Ane Hansenip nalorninartoqartippaa.
Assi.: Vilhelm Lynge Hard
Kommune Qeqertalik kommunit kattuffianut ilanngunnissaminut nangaavoq

Kalaallit Nunaanni Kommunit Kattuffiat Kanukoka sapaatit akunnerata naanerani Qaqortumi isumasioqatigiissaaq tassani kommunit Kanukokallu siunissaat oqaluuserineqarlutik.

Aallartitat ataatsimiinnerat kinguartinneqartoq
- Suut tamarmik oqaluuserineqassapput, kattuffiaup siulittaasua Simon Simonsen Sermitsiamut oqarpoq.

Kommunit Qaqortumi ataatsimiinnerat aallaqqaammut apriilimi kommuninut qinersinerup kingorna nalinginnaasumik aallartitanut ataatsimiiffiusussaagaluarpoq, siulersuisulli aalajangerpaat aallartitat ataatsimiinnissaat kinguartinneqassasoq.

Peqataasussat ullorsiutini septembarip 8-at 9-allu ataatsimiiffissatut nalunaaqutserpaat, taarsiulluguli Kanukoka isumasioqatigiissitsiniarpoq »Kommunit Kanukokallu siunissaat« qulequtaralugu.

- Aallartitaasut ataatsimiinnissaat ukiumut nutaassamut kinguartinneqarpoq, taamaalillutik avannaani kommunit nutaat marluk januaarip aallaqqaataani Qaasuitsup Kommuniata avinnerata kingorna pinngortussat tamakkiisumik taasisinnaallutik peqataasinnaallutik, Simon Simonsen nassuiaavoq.

Nutaat ilaasortanngornissaat nalorninartoq
Nalorninarporli kommunit nutaat kommunit kattuffianut ilaasortaarusussanersut.

- Kommune Qeqertalik Kanukokamut ilanngukkusussava januaarip aallaqqaataani kommuninngoruni?  

Naagga, ukiup affaani siullermi piffissaq takoqqaarallassavarput, taava oqaluuserissavarput ilaarusunnerluta ilaarusunnginnerlutaluunniit, Kommune Qeqertalimmi ikaarsaariarnermut ataatsimiititaliami siulittaasoq Ane Hansen Sermitsiamut oqarpoq.

Eqqarsarnartut
- Suut eqqarsarnartoqartinneqaramik?

- Allattoqarfik illoqarfimmiittariaqarpoq kommunit pingaarnertut isumaqatigiinniarfigisartagaasa inissisimaffiani, ingammik Namminersorlutik Oqartussat sumiiffianni. Taamaattumik kommunit kattuffiata allattoqarfiata Nuummiit Maniitsumut nuunneqarnera kukkuneruvoq. Aamma takusinnaavarput Maniitsumut sulisussarsiorneq ajornartorsiutitaqartoq, taamaalilluni allattoqarfimmi immikkut ilisimasallit ilisimasaat pigineqarunnaarput. Apeqqutaavoq ammasoq ilaasortaanermut akiliutitsinnut pissarsisinnaanersugut.

Ane Hansen nammineq Qaqortumi isumasioqatigiinnermut ilaasorunngilaq.

Allaaserisaq tamaat Sermitsiami atuaruk, taanna uani ataani digitaliusoq linki toorlugu akiliillutit atuarsinnaavat:

Seneste nyheder / Nutaarsiassat kingulliit