Tuesday, November 14, 2017 - 11:26

Kommune mittarfimmik piginneqataarusuttoq

Assi.: Hans Jukku Noahsen
Kommuneqarfiit pingaarnersaata inatsisiliupallanneq, mittarfiliortitsinermi kommunit pilliutingalugit millionilikkuutaanik nunap karsianut qulakkeerinnittussaq, sakkortuumik isornartorsiorpaa.

Kommuneqarfiit pingaarnersaasa aningaasaqarnermut naalakkersuisoqarfiup tusarniaaneranut akissuteqarnermini mittarfinnut pilersaarumik piginnittuuneq pillugu oqaloqatiginnissamik neqerooruteqaqqippoq, taamaasiornikkut inatsisiliupallannerup ilaa pisariaarutissalluni.

Atukkanik assigiinngisitsineq naammagineqanngitsoq

Mittarfiliortussat avataaneersuuneri Nunaqavissuuneriluunniit apeqqutaatillugit akileraarusersorneqarneri, Kommuneqarfik Sermersuup naammagisimaanngilaa. Inatsiliupallannermi suliniummi avataaneersut 35 procentiinnarmik, ilanngaasersungaanngitsunillu, akileraarnissaat pilersaarutaavoq.

Avataaneersulli sulisorineqarnerisa akikinnerunissaat pissutigalugu, najukkami sulisinnaasut suliniummi suliffittaarsinnaassaannginnerat, kommunip ernumassutigaa. Ajornerpaassaarlu avataaneersuniinnaq sulisoqarluni mittarfiliortoqassappat, taamaasisoqarpalli 135 million koruunit kommunip isertitassaraluani annaassavai.

Ajornartorsiutillu aappaa tassaavoq Naalakkersuisut DUT-mik tunngaveqarneq 2017-imut aningaasanut inatsimmi allassimasumi taamaatinniarpaat.

Maleruagassat

- Missingersuutit pillugit isumaqatigiissummut illuatungeriit tamakkiisumik oqimaaqatigiittoqarnissaanut tunngaviup (DUT-mik taaneqartartoq) atorneqarnissaa immikkut pingaartissimavaat suliniutini kommuninut sunniuteqarfiusuni. DUT-mik aallaaveqarneq iluarsiissutitut atortussaavoq, namminersorlutillu oqartussat maleruagassanik kommunit aningaasaqarnerannut sunniisussanik allannguigaangata ataatsimoortumik tapiissutit iluarsiiffigineqarnerannut qulakkeerinnittartuuvoq. Tamatuma kingunerissavaa ataatsimoortumik tapiissutit iluarsiiffigineqartassammata kommuninut aningaasartuutit tungaasigut sunniutissanut naapertuuttunngortillugit. Tunngavigisaq illuatungeriinnut tamanut atuuppoq, tassa kommunit aningaasartuuteqartinneranni imaluunniit imaluunniit suliassaannik oqilisaaffigineranni, taamaalillunilu aningaasartuutikinnerulersitsiniarnermi, aningaasanut inatsisissatut siunnersuummi "Missingersuutit pillugit kommuninik suleqateqarneq" qulequttap ataani allassimasoqarpoq.

Aallaaviit akuersissutigineqarsimasut unioqqutinneri

Aningaasaqarnermut pisortaq, Troels Tolstrup Pedersen, tusarniaassuutip akissuteqarfigineqaranut atsiortuusoq, ingerlaannarluni malugisimavaa, oqaasertaliunneqarsimasoq 2018-imut Aningaasanut Inatsimmi oqaasertaliunneqaqqissimanera, taamaammat inatsisiliupallanneq, DUT-mik aallaaveqartumik akuersissuteqarsimaneq, kommunit unioqqutitsinertut nalilersinnaavaat.

- Tamanna Namminersorlutik Oqartussat isummerfigisariaqarpaat, Kommuneqarfik Sermersooq tusarniaanermut akissuteqarluni erseqqissaavoq. 

Seneste nyheder / Nutaarsiassat kingulliit