Kommune Kujallermit nalunaarusiaq: Qaqortumi mittarfik akilersinnaavoq
KPMG-ip Kommune Kujallermut nalunaarusiaani takuneqarsinnaavoq Qaqortumi mittarfik mittarfittaarnerup inuiaqatigiinnut aningaasatigut iluanaarutaassasoq. Mittarfik sananeqassappat takornariarpassuaqalernissaa naatsorsuutaavortaaq
Qaqortumi mittarfissap inuiaqatigiinnut iluanaarutaasinnaanersoq Kommune Kujalliup KPMG Advisory nalunaarusiortippaa. Inuiaqatigiinnut iluanaarutaasinnaasoq nalunaarusiap takutippaa.
Qaqortumi 1.500 meterisut takitigisumik mittarfik 47 million koruuninik inuiaqatigiinnut iluanaarutaassasoq KPMG-ip nalunaarusiaani atuarneqarsinnaavoq.
Sivikinnerusumik angalaneq
Kiffartuussinermik isumaqatgiiissutit aamma piffissaq sivikinnerusumik angalasalernissat nalilersorneqarmata innuttaasunut 47 million koruuninik inuiaqatigiinnut iluanaaruteqartoqassasoq naatsorsorneqarpoq.
Taamaattoq Narsarsuup heliportinngortinneqarnissaa siunnerfigineqarpoq. Taamaattoqanngippammi sinneqartooruteqartoqarunnaassaaq. Takornariaqarnerulernissaanut naatsorsuutit tassani ilaatinneqanngillat.
Narsarsuarmit Qaqortumut nuunnermut KPMG-mit naatsorsorneqarsinnaasimanngilaq.
Narsarsuup atatiinnarneqarnissaa 31 million koruuninik nalileqassasoq KPMG-mit naatsorsorneqarpoq.
Takornarialerineq
Qaqortumi atlantikup avannaani mittarfissatut sananeqassasoq siunnersuutigineqarpoq, tassa mittarfik 1.500 meterisut takissuseqarnissaa siunnersuutaavoq. Angallannermut siunnersuummi Qaqortup mittarfia nunap iluani mittarfissatut kisimi atorneqassasoq siunnersuutaavoq. Atlantikup avannaani mittarfiussappat Islandimit, europap avannaanit, Canadamit USA-mi New Englandimi statimit miffigineqarsinnaassaaq aasakkut.
Taamaasiortoqarsinnaassappat KPMG-mit upperineqarpoq takornarialerinerup tungaatigut ineriartorfiusinnaanissaa. Tamanna Savalimmiuni takuneqareerpoq, tassami 7,5 procentimik takornariat amerleriarnikuupput, Islandimi 22 procentiulluni. KPMG-mit toqqaannartumik ilisimatitsissutigineqanngilaq kisitsisit sumit aaneqarsimanersut.
Nalunaarusiaq borgmester Kista P. Isaksenimit tupaallaataanngitsumik nuannaarutigineqarpoq.
- Qaqortumi mittarfik Kujataani aningaasarissaarnerulernikkut kommunip imminut napatinnissaannik anguniakkatsinnut qularutissaanngitsumik toqqammaviliissaaq. Borgmester Kiista P. Isaksenip oqaatigaa misissueqqissaarnermi inerniliunneqarsimasoq Qaqortumi mittarfiliornikkut Kommune Kujallermi innuttaasut ukiut kingulliit qulit assut ikiliartorsimagaluarnerat ilorraap tungaanut saatsinneqassasoq mittarfiliornerup suliffissanik nutaanik nassataqartussaanera pissutigalugu, tusagassiutinut nalunaarummi oqarpoq.