Kujalleq
Kommune Kujallermi sulitilluni pujortartoqartarunnaassaaq
Kommune Kujallermi sulisut januaarip aallaqqaataanit sulitillutik pujortaqqusaajunnaassapput. Pujortartarunnaarniarluni pikkorissarnerit aallartissapput
Kommune Kujallermi amerlanerussuteqarluartut sulinerup nalaani pujortartarnermut siunnersuut akuersissuteqarfigaat.
Kommune Kujallermi sulisut, meeqqat atuarfiini, paaqqinnittarfinni, utoqqaat illuanni aamma sunngiffimmi ornittakkani sulisut sulinerup nalaani pujortarsinnaajunnaarnissaannik tamanna isumaqarpoq.
Malittarisassat nutaat januaarip aallaqqaataani 2018-imi atuutilissapput.
Sulisut maligassiuissapput
Inuit Ataqatigiit kommunalbestyrelsimut ilaasortaatitaat, Naja Lund, pujortartarnerup inerteqqutaalernissaanik siunnersuuteqartuuvoq. Siunnersuutip akuerineqarnera taassuma qiimmatsaatigaa.
- Inernera naammagisimaartorujussuuara. Pujortartarnerup inerteqqutaalernissaa qilanaaraara, taamatummi aaqqiissuteqarneq peqqinnissaqarfinni iluatsereersoq nalunngilarput, kommunimilu tamani pitsaasumik sunniuteqassasoq qularinngilara, Naja Lund Sermitsiaq.AG-mut oqarpoq.
Sulisut tamarmik meeqqanut maligassiuisuunissaat pingaaruteqartoq taanna isumaqarpoq, peqqinnerulernissarlu pillugu aamma siunnersuuteqarsimavoq.
- Kommunalbestyrelsimut ilaasortanngoramali taanna siunnersuutiginiarlugu eqqarsaatigaara, siornatigut Juliane Henningsen (Inarsisartunut ilaasortaasimasoq) assingusumik siunnersuuteqarnikuuvoq, taannalu assut isumaqatiginikuuara, Naja Lund erseqqissaavoq.
Kommune Kujalleq ukiup nutaap aallartinnginnerani pujortarunnaarnissamut pikkorissartitsissasoq naatsorsuutigaa.