kommuninut qinersineq 2017
Kommune Kujallermi Siumut pissaaneqarluartoq
Siumut Atassullu suleqatigiinnissamik isumaqatigiissuteqarsimapput, isumaqatigiissummi Siumut borgmesteriuteqarnerup saniatigut borgmesterimut sinniisussaateqassaaq. Atassut inuusuttunut suliniaqatigiiffik pilersinneqaqqammertoq oqartussaaffigissavaa
Kiista P. Isaksen (S) Kommune Kujallermi borgmesterinngussaaq. Tamanna qinersinerup unnukkuani qulakkeerneqareersimavoq.
Siumuminngaanneersorli Simon Simonsen Kommune Kujallermi borgmesterimut sinniisussanngortinneqarsimalluni.
Kiista P. Isaksen, Sermitsiaq.AG-mut paasissutissiivoq.
Atassut sinnerlugu kisiartaalluni kommunalbestyrelsimut ilaasortanngortup Bentiaraq Ottosen, Aningaasaqarnermut ataatsimiititaliami ilaasortanngortinneqarpoq.
Atuaruk: IA Kommune Kujallermi isumaqatiginninniarunnaarpoq
Aammattaaq politikerip inuusuttup, immikkut inuusuttunut suliniaqatigiiffik pilersinneqaqqammertoq oqartussaaffigissavaa. Inatsisartuni inuusuttut ataatsimiisinneqartarnerat assigusumik inuusuttut tassani kommunalbestyrelsimut ilassuteqaatigisinnaasatik tunniuttassavaat.
Ippassaq Inuit Ataqatigiit, Siumut isumaqatigiissuteqarfigisinnaannginnamikku illuatungiliuttunngorniarlutik nalunaaruteqarput. Kommunalbestyrelsimi issiaviit agguataarneqarsimaneri aallaavigalugit IA-p borgmesterimut tullertut sinniisussaateqalissapput.