Kommune Kujallermi inuussutissarsiornermut siunnersuisoqatigeeqalilersoq
Kujataani kommunimi inuussutissarsiornermut siunnersuisoqatigiinnik pilersitsinikkut inuussutissarsiornermi suleqatigiinnerup nukittorsarneqarnissaa aamma unammilligassarpassuit iluarsiiviginissaat neriuutigineqarpoq.
Qaqortumi katersortarfimmi inuussutissarsiortut isumasioqatigiinneranni inuussutissarsiortorpassuit aamma kommunalbestyrelsimi ilaasortat peqataapput, inuussutissarsiornermilu unammilligassat ilaat oqaluuserineqarput.
- Isumasioqatigiinnerup matuma siunertaraa inuutissarsiortut akunnerminni nammineerlutik piumasaqaatiminnik anguniakkaminnillu saqqummiinissaat. Inuutissarsiornikkummi unammilligassat aaqqiivigissagutsigit periarfissallu aqqutissiuutissagutsigit inuutissarsiuteqartut kommunillu akornanni suleqatigiilluarnissaq pingaaruteqarmat, Kommune Kujallermi borgmesteri Kiista P. Isaksen tusagassiuutinut nalunaarummi ilisimatitsivoq.
Sulisunik inissianillu amigaateqarneq
Inuussutissarsiortut sulisussaaleqineq aamma inissaaleqineq unammilligassaasa ilagaat.
Inuussutissarsiornermi siunnersuisoqatigiit nutaat inuussutissarsiortut aamma kommunip akornanni suleqatigiinnerup nukittorsarneqarnissaanik siunertaraat.
Inuutissutissarsiornermut siunnersoqatigiinnik pilersitsisoqarnissaanut atatsillugu Kommune Kujalleq, oktoberip aallartisimalernerani soqutigisaqaqatigiinnut isumasioqatigiinnermi aaliangiunneqartunut qaaqqusiniarpoq.