Kommunalbestyrelse
Kommune Kujallermi inissipput
Siumumit Atassummillu taaneqarluni ullumimiit Kommune Kujallermi borgmesterinngorpoq Siumumeersoq Kiista P. Isaksen
Borgmesterinngortitsinermi Inuit Ataqatigiit Borgmesterissamik innersuussineq taaseqataaffiginngilaat tusaatissatulli tigullugu.
Borgmesterip tullia siulleq tassaavoq aamma Siumumeersoq Simon Simonsen kiisalu Borgmesterip tulliata aappassaa makitsinikkut Inuit Ataqatigiinnit inuttalerneqarpoq, taamaalilluni Henrik Brummerstedt Bormesterip tulliata aapparilerpaa.
Ataatsimiititaliat agguataarneri kakkiullugu ilanngunneqarsimasumi takuneqarsinnaapput.
- Ulloq qilanaarisara nalliuppoq, qujaffigerusuppakkalu tapersersorterpassuakka, akisussaaffik maniguullunga tunniusimallungalu tiguara, sapinngisara tamaat qinigaaffimmi Kommunitsinni innuttaasut tamaasa tamaviisa, illoqarfinniippata, nunaqarfinniippata aammalu nunalerisuullutik avinngarusimasuuppata tamaasa assigiimmik sullissavakka, Kiista P. Isaksen oqarpoq nangillunilu:
- Soorunami kissaatigisimagaluarpara tamatta partiit akimorlugit suleqatigiinnissaq siunnerfigissagipput, taamaattorli Inuit Ataqatigiit toqqarmassuk illuatungiliutissallutik, tamanna tusaatissatut tiguara, qularutiginngilarali illuatungeriikkaluarluta Kommune Kujallermi innuttaasutsinnik sullissinitta pitsaasuunissaa qitiutillugu suleqatigiilluarumaartugut.
Tamannalumi aamma Inuit Ataqatigiit tungaanniit kissaatigineqarpoq:
- Inuit Ataqatigiinniit illuatungiliunnissarput toqqarparput aamma Borgmesterissamut taaseqataannginnissarput toqqarparput, taamaakkaluartorli qularutigineqassanngilaq nukivut tamaasa atorlugit suleqataalluarumaartugut namminerlu siunnerfigatsinnik saqqummiussuilluartarumaartugut, Borgmesterip tulliata aappariligaa Inuit Ataqatigiinneersoq Henrik Brummerstedt oqarpoq.