atortorissaarutit

Kommune Kujallermi atuartut iPaditaartinneqarput

Nanortalimmi, Qaqortumi Narsamilu meeqqat atuarfiani atuartut Kommune Kujallermi siulliullutik iPaditaartinneqarput

Kommune Kujallermi meeqqat atuarfiani atuartut ullumi ataasinngornermi iPaditaartinneqassapput.

iPadinik agguaaneq aallaqqaammut taamaallaat illoqarfinni pingasuni, tassa Nanortalimmi, Qaqortumi aamma Narsami ingerlanneqassasoq, nunaqarfinnilu atuartut agguaavigineqarnerat aggustip qaammataata ingerlanerani piumaartoq, Kommune Kujallermi atuarfinnut siunnersorti, Anders Stephensen ilisimatitsivoq.

Atuartunut iPadinik agguaasoqalerpat atuartut nukarliit siulliullutik iPaditaartinneqassapput.

Qaqortumi Tasersuup Atuarfiani agguaaneq nalunaaqutaq quliniit ingelanneqalissaaq, Nanortallip Atuarfianni agguaaneq nalalunaaqutaq 11.25 aalllartissalluni - Narsallu Atuarfiani iPadini agguaaneq nalunaaqutaq 11.30 aallartissalluni.

- Kommune Kujallermiit pingaartilluinnarput kommunitsinni meerartartatta tamarmik naligiimmik periarfissaqartitaallutik teknologimik nutaanerpaamik atuisinnaanissaat, matumani apeqqutaatinnagu angajoqqaat qanoq isertitaqartiginersut, Kommune Kujallermi borgmesteri, Jørgen Wæver Johansen oqarpoq.

200-t aggustimi tunineqassapput
Kommune Kujallermi meeqqat atuarfiini atuartut iPaditaartinneqarnerat aningaasaateqarfiup Villum Fondenip aningaasaliissuteqarfigaa. Villum Fondenip katillugit 17 million koruuninik aningaasaliissuteqarneratigut Qeqqata Kommuniani aamma Kommune Kujallermi atuartut - ilinniartitsisullu - tamarmik iPadinik agguaavineqarnissaat piviusunngorsinnaalerpoq.

Kommune Kujallermi iPadit agguaanneqartussat katillutik 1.000-t missiliorlugit amerlassuteqartussaapput, ataasinngornermi juunip ulluisa aappaani illoqarfinni pingasuni agguaanneqartussat 800-t missiliorlugit amerlassuseqarput, taavalu nunaqarfinni atuartunut – aamma Kommune Kujallermi aggustimi atualeqqaartussanut – agguunneqartussat katillutik 200-t missiliorlugit amerlassuseqartussaapput.

Powered by Labrador CMS