Kommune Kujalleq: Narsap eqqaani minkiuteqarfiliornissamut siunnersuut

Kommune Kujallliup kommunip pilersaarutaanut tapiliussamut, Narsap eqqaani minkiuteqarfiliortoqarnissaanut siunnersuut saqqummiussaa maanna tusarniaassutigineqarpoq.

19/3 nal. 11.19 nutarterneqarpoq: IA-p suliniummut akerliulluni nalunaarutigisimasaat ilanngunneqarpoq.

Kommunip pilersaarutaanut tapiliussamik minkiuteqarfiliortoqarnissaanut periarfissiisoqassaq, taanna inuusuttunut savaatilinnullu ilinniarfittut suliniutaassaaq, Narsap eqqaani nunami ammaannartumi inissisimassalluni.

Minkiuteqarfimmik angisuumik 2000 m2-nik angissusilimmik sanaartortoqarnissaa pilersaarutaavoq.

Haalit marluk

- Minkiuteqarfik nunaminertami manikannersumi inissisimassaaq aallaqqaammullu haalinik marlunnik 809 m2-t missaanni angissusisilinnik sanaartortoqassaaq, kiisalu torsuusami H-tut ilusilimmik 139 m2-t missaanni angisussilimmik sanasoqassalluni. Minkiisiviit saniatigut nerukkaasiorfeqarnissaq, peqqumaasiveqarnissaq, ameeriveqarnissaq, sannavqarnissaq sulisullu ineqarnissaat periarfissaassapput, tusarniaassutigineqartumi tamanna allaqqavoq.

Kommunip pilersaarutaani sumiiffik Narsap avannaata kangiani inuussutissarsiorfimmi inissisimavoq, teknikkikkut siunertanut sanaartorfissaalluni.

Tusarniaassutigineqartoq

Kommunip pilersaarutaanut tapiliussamut minkiuteqarfiliornissamut siunnersuummut tusarniaassutigineqartoq tamaat una linki toorlugu atuaruk.

Siunnersuut sapaaatip-akunnerini arfineq-pingasuni tusarniaassutigineqassaaq, piffissami marsip 13-annit maajip arfineq-pingajuannut 2018.

IA suliniummut akerliusut

Inuit Ataqatigiit Kommune Kujallermi gruppiata marsip aallartinnerani minkiuteqarfissamut suliniummut akerliullutik nalunaarutiginikuuaat.

- Aningaasat atorneqareersut atorneqartussallu qaavatigut aningaasaliissutaaqqittussat annertummata, inuussutissarsiutinut inerisagassanut allanut atorneqarnissaat isumatusaarnerussammat, kommunittalu ataavarnerusunut inuussutissarsiutaasunut siunniuffigisariaqaripput isumaqarpugut, Inuit Ataqatigiit kommunalbestyrelsimi gruppianni siulittaasoq, Mouritz Karlsen oqarpoq.

IA-p Kommune Kujallermi gruppiata siunnersuutigaa, aningaasat ilaatigut Neqi A/S-imi toqoraavimmut atorneqarsinnaasut, taamaalilluni ukioq kaajallallugu tunisassiornissamut periarfissaqassammat, aammalu takornariartitsilluni inuussutissarsiornerup ineriartortinneqarnissaanut.

Powered by Labrador CMS