Kommune Kujalleq: Taamaammat kommuuni sukannersumik nakkutigisaavoq

KNR-ip sapaatip akunnerani kingullermi ilisimatitsitsissutigaa Kommune Kujalleq Kommuneqarfik Sermersuutulli Namminersorlutik Oqartussanit siorna marsip 15-aniilli sukannersumik nakkutigineqarsimasoq.

Kommune Kujallermi aningaasaqarnermut pisortap, Kim Rosendahlip, tusagassiuutitigut nalunaaruteqarluni uppernarsarpaa kommuuni sukannersumik nakkutigineqartoq, kisianni Kommune Kujalleq Kommuneqarfik Sermersuumut assersuunneqarsinnaanngitsoq.

- Kommunit taakku marluusut Aningaasaqarnermut Naalakkersuisoqarfimmiit piffissap ilaani ataatsikkut sukannersumik nakkutigineqarsimapput, tamannalu tassaavoq kommunit taakku assigiissutigisatuarisaat, aningaasaqarnermut pisortaq allappoq.

Kim Rosendahl nangilluni allappoq Kommuneqarfik Sermersooq innuttaasuminut sullissernermini pitsaanerusumik ukiorpassuanngortuni ingerlatsinissaminut akissaqarsimasoq, Namminersorlutik Oqartussat sulisuisa ingerlatseqatigiiffiillu Namminersorlutik Oqartussanit pigineqartut sulisuisa, akileraarutitigisartagaat toqqammavigalugit.

- Naligiissaarutit, nunami maani kikkut tamarmik naligiinnerusumik atugaqartitaanissannik qulakkeerinneqataasussaagaluartut, ajoraluartumik kommunit akornanni aningaasaqarnikkut naligiinnerusumik atugaqartoqalernissaanut tunngavissiisimanngillat, Kim Rosendahl allappoq.

Atuaruk: Kommuneqarfik Sermersooq sukannersumik nakkutigineqalersoq

Qitiusumik aqutsineq nakkutigisaanermut pissutaavoq
Kim Rosendahlillu nassuiaanera naapertorlugu Kommune Kujalliup aningaasaqarnermigut ilungersunartumik inissisimalersimaneranut pissutaanerpaavoq akileraartarnermut tunngasut qitiusumik aqunneqalersimanerat.

- Akileraartarnermut tunngasut 2007-mi qitiusumiit aqutarineqalermatali akileraarutigineqartartut allanngorarnerat Kommune Kujalliup malinnaavigisinnaajunnaarpai. Taamanikkumiit qaammatikkaartumik kommunit akiliuteqarfigineqarallartalerput. Akiliutigineqarallartartut angissusissaat Akileraartarnermut Aqutsisoqarfimmiit taamanikkut missingersorneqarpoq. , Kim Rosendahl nassuiaavoq, imalu nangilluni:

- Tamatuma kingorna paasinarsivoq Kommune Kujalleq piffissami sivisujaami amerlavallaanik akiliuteqarfigineqarallartarsimasoq. Soorunami tamatuma kingorna tunniunneqarallartut amerlavallaarutaat Namminersorlutik Oqartussanut utertinneqartussanngorput.

Aningaasaqarnermut pisortap ilanngullugu ilisimatitsissutigaa Kommune Kujalleq Namminersorlutik Oqartussanut taarsersuinissaminut isumaqatigiissumminut siullermut malinnaaniarnissaminut periarfissalussimasoq, kommuni aningaasaqarnermigut ilungersunartumik inissisimammat.

- Qularutigineqassanngilaq Kommune Kujalliup aningaasaqarnikkut aqutseriaatsimi aaqqissuunneratigut taarsersuinissamik isumaqatigiissut malillugu akilersuisinnaanissani qulakkeertussanngorsimagaa, massa naligiissaarutit suli nunatsinni innuttaasut tamarmik, kommunillu sisamat akornanni, naligiimmik atugassaqartitaanissamut suli qulakkeerinnittunngorsimanngikkaluartut, aningaasaqarnermut pisortaq allappoq.

Kommuneqarfik Sermersooq sukannersumik nakkutigineqarunnaareersoq, Kommune Kujalleq suli sukannersumik nakkutigineqarpoq.

Atuaruk: Sermersooq sukannersumik nakkutigisaajunnaarpoq