Angallanneq

Kommune Kujalleq: Suliarinnittussarsiornermi piumasaqaatit malinneqanngillat

Suliarinnittussarsiornermi piumasaqaatit malinneqanngitsut, Kommune Kujalliup oqaaseqaammi suliarisimasaani arlalissuartigut tikkuarneqarput. Maleruagassat naapertorlugit pisoqarsimasoq, Naalakkersuisut isumaqarput

Kiffartuussinermut isumaqatigiissut atorunnaarsinneqarsinnaavoq - aamma taamaattussaasimagaluarpoq.

Kommune Kujalliup novembarip qulingiluaani ukiormanna Kujataani angallannermut kiffartuussinermut tunngatillugu oqaaseqaammi suliarisimasaani, tamanna pingaarnertut oqariartuutigineqarpoq.

Oqaaseqaat siunnersortaanermit Michael Mikkelsenimit suliarineqarsimasoq naapertorlugu, suliarinnittussarsiornermut piumasaqaatit arlalitsigut malinneqarsimanngillat, taamaattumillu aallaqqaataaneerneqartariaqarput.

Atuaruk: Kiffartuussinermut isumaqatigiissutit Wæverip kamaatigigai: Mattusersuilluni aaqqiinerit akisuut

Kinguaattoornermi unnuinerit
Ingerlariaqqinnissamut aqqutissaarukkaanni unnuineq kimit akilerneqartassaneranik apeqqut akerleriissutaasut ilagaat.

Suliarinnittussarsiornermi piumasaqaatini angallassisoq unnuinermut nerisaqartitsinissamullu neqerooruteqartassasoq allaqqavoq, soorlu Air Greenland maanna taama iliortartoq.

- Kiffartuussinermut isumaqatigiissummi tamatuma naammassineqarnera nassuiarneqanngilaq, oqaaseqaammi allaqqavoq.

Oqaaseqaatip suliarineqarnerani tamanna neqeroorut saniatigut isumaqatigiissusiornermut atatillugu aningaasartalerneqarnikuuvoq. Tamannali takornarissanut atuutinngilaq.

Atuaruk: Kiffartuussinermut isumaqatigiissummut 22 millionit saniatigut aningaasaliissutaasut

Martha: Suli akikinnerpaavoq
Borgmesterimut Jørgen Wæver Johansenimut (S) akissuteqarluni attaveqarnermut naalakkersuisoq, Martha Lund Olsen (S) tassunga tunngatillugu allappoq.

- Tunngavissamut ajugaasumut saniatigut pisiassatut pilersaarutaasut atorlugit angallannermi sullissinermut maanna atuuttumut aammalu tunngavissamut ajugaatinneqartumut naleqqiullugit pitsannguinerit annertuut arlaliussapput, ammasumik allagaani tamanna allaqqavoq.

Saniatigut neqeroorutit aningaasaliiffigineqartulluunniit ilanngullugit kisikkaanni, allagaq naapertorlugu neqoroorut toqqarneqartoq pitsaanerpaallunilu akikinnerpaavoq.

Tassalu tapiliussatut isumaqatigiissutissatut pilersaarutit isumaqatigiissutigineqarnerat naliliinermik nikisitsissasut paatsoorneruvoq, saniatigut pisiassatut pilersaarutaasut pitsaassutsimik qaffaanermik kinguneqartussatut naliliiffigineqarmata, Martha Lund Olsenip (S) allagaani immikkut erseqqissarneqartumi allaqqavoq.

Taassuma allagaani neqeroorutit allat marluk suliarinnittussarsiornermut unnuisitsisarnissamut piumasaqaatinut naammassinninnersut takuneqarsinnaanngilaq, taamatullu tamatumunnga tunngatillugu saniatigut aningaasaleeqqittoqarnissaanik pisariaqartitsisoqarsimanersoq.

Atuaruk: Kiffartuussinermut isumaqatigiissutini pitsanngoriaatit sisamat

Isumaqatigiinniarnerni aki qaffattoq
Isumaqatigiinniarnerni Disko Linep Air Greenland qulimiguulimmik angallassisussatut sulisussarsiarinera arlalitsigut akunnakusoortoqartoq, Kommune Kujalliup oqaaseqaatimini nalilerpaa.

Oqaaseqaat naapertorlugu siullermik Disko Linemit neqeroorut, umiarsuaannarmik aaqqiissuteqarnissamut tunngasimagaluarpoq.

Qulimiguulimmik angallassineq Naalakkersuisoqarfiup aamma Disko Linep isumaqatigiinniarneranni ilanngunneqarsimavoq, neqeroorutaasup siulliup tunniunneqareernerata kingorna.

Tamatuma saniatigut ukiaanerani aningaasaleeqqinnissamut 5,5 millionit koruuninit 15 millionit koruuninut pisariaqartitsineq oqaaseqaat naapertorlugu qaffariarsimavoq aamma upernaakku 4 millionit koruuninit 21 millionit koruuninngorluni.

- Inuiaqatigiit aningaasaqarnerannut illersorneqarsinnaasumik marloqiusamik angallassinissamut aaqqiissummik 36,7 millionit koruuninik aningaasaleeqqinnissamik pisariaqartitsisumik angallassisumut ataatsimut isertorluni isumaqatiginninniarnernerit tunngavigalugit akuersineq apeqquserneqartariaqarpoq, siunnersortaaneq Michael Mikkelsen naliliinermini oqarpoq.

Atuaruk: Kiffartuussinermut isumaqatigiissutit siornarnit akisunerulertut

Air Greenlandimik isumaqateqarneq?
Tamatuma tulliatut oqaaseqaammi Disko Linep Air Greenlandimut qulimiguulimmik angallassinissaq pillugu isumaqatigiissuteqarnera apeqquserneqarpoq.

- Disko Line A/S juunip 15-at 2016 sioqqullugu neqerooruteqannginnermini naalakkersuisoqarfimmik isumaqatiginninniartilluni, Disko Line Air Greenland A/S-imut akimik isumaqateqareersimasinnaaneranik, tamannalu Disko Linep kiffartuussinermut isumaqatigiissummik qulakkeerinninneranut nalorninartoqarpoq, oqaaseqaammi taama naliliisoqarpoq.

Tamanna kisiat tunngavigalugu oqaaseqaat naapertorlugu kiffartuussinermut isumaqatigiissut atuuttussaanngikkaluarpoq.

Atuaruk: Wæverip kiffartuussinermut isumaqatigiissutinik suliaq aallaqqaataaneerusuppaa

Malittarisassat malinneqartut Martha isumaqarpoq
Naalakkersuisuniilli ajunngitsumik ingerlasoqarnera attanneqarpoq.

- Pisuni arlalinni erseqqissaatigisarpara, kiffartuussinissamut isumaqatigiissutit isumaqatigiissutiginiarneqarnerini sukkulluunniit naligiissitsinissamut uniuuttutut isikkoqartutut Naalakkersuisunit isigineqarsinnaanngimmat, Martha Lund Olsen (S) Jørgen Wæver Johansenimut (S) allappoq.

Aammalu kiffartuussinermut isumaqatigiissutit atsiorneqartut illuatungeriinnut unioqquteqqusaanngitsut maluginiaqquaa.

- Taakku saniatigut inaarutaasumik erseqqissaatigissavara, isumaqatigiissutaareersut taamaatinneqarsinnaanngimmata imaluunniit taamaatinneqassanngimmata, Martha Lund Olsen allappoq, allakkanilu oqaatsit uku atorlugu naggasiivoq:

- Taamatut oqaaseqarlunga kiffartuussinissamut isumaqatigiissutit pillugit oqallinneq naasutut isumaqarfigaara.

Martha Lund Olsenip ammasumik allagaa una toorlugu atuarsinnaavat

Powered by Labrador CMS