Kujalleq
Kommune Kujalleq sukumiisumik nakkutigineqarunnaarpoq
Kommune Kujalliup aningaasaqarnini maanna iluarsisimalerpaa, taamaattumillu naalakkersuisup Vittus Qujaukitsup Namminersorlutik Oqartussat sukumiisumik nakkutiginninnerat taamaatippaa
Kommunip aningaasaqarniarnera massakkut iluarsivoq, Aningaasaqarnermullu, Aatsitassanut Nunanullu Allanut Naalakkersuisoq Vittus Qujaukitsoq aalajangerpoq kommunip sukumiisumik nakkutigineqarnera unissasoq.
Atuaruk: Kommune Kujalleq sukannersumik nakkutigineqalersoq
Kommune Kujalleq 2014-imiilli aningaasaqarnermut naalakkersuisoqarfimmiit sukumiisumik nakkutigineqalerpoq. Tamatumunngalu pissutaasimavoq aningaasaqarnerlunneq ajortumillu akiliisinnaassuseqarneq, nunattalu karsianit taarsigassarsiarisimasat akilersornissaat pillugu isumaqatigiissutaasumik eqqortitsisimannginneq.
Atuaruk: Kommune Kujalleq: Taamaammat kommuuni sukannersumik nakkutigisaavoq
Sulianik agguaassineq
Aningaasaqarneq iluarsiiffiginiarlugu Kommune Kujalleq kommunimi suliassat tamarmik suliarineqarsinnaasunik suliarisariaqakkanillu agguaasimavoq. Missingersuutit pillugit isumaqatigiinniarnerit tassuuna oqinnerulersimapput, kommunimilu aqutsisutut sulisut ilaatigut ikilisinneqarsimallutik.
Tamakku saniatigut kommuni nalimmassaanerit avataasiorlunilu saarullittassanik tulaassisussaatitaanerit aqqutigalugit isertitaqarnerulersimavoq.
Suleqatigiinneq
- Suleqatigiilluta aningaasaqarnerput illuanut saatissinnaasimavarput. Sipaarniarfiusussat aaqqissuussaanikkullu allannguinerit kisiisa aqqutiginagit, kisiannili aamma aalisakkanik suliffissuarni sanaartortitsinernilu ataasiakkaani iluanaarutit annertusarnissaat isiginiarnerunerisigut. Tamatumunnga peqatigitillugu kommunimi aningaasartuutit aalajangersimasut allanngorartullu ikinnerulersissimavagut, Kommune Kujallermi borgmesteri Jørgen Wæver Johansen (S) erseqqissaavoq.
- Naalakkersuisut paasinnilluarsimapput nunatsinni pisortat suliassaasigut akileraarutitigut isertinneqartut aqqutigalugit nalimmassaanermut aaqqissuussinermik naleqqunnerusumik pilersitsinissaminnut, ilanngullugu oqarpoq.
Ataaseq kiserngoruttoq
Qaasuitsup Kommunia taamaalilluni kisiartaalluni suli sukumiisumik nakkutigineqarpoq.
Atuaruk: Qaasuitsup Kommunia nakkutigisaagallarneqalerpoq