kommunimi missingersuut
Kommune Kujalleq missingersuutimini rekortiliisoq
Kujataani kommunip 2018-imut missingersuusiaa 7 million koruuninik sinneqartoorfiulaartoq akileraarummillu allannguuteqarfiunngitsoq, naammassineqarpoq.
Sanaartugassanut aningaasaliissutit aatsaat taamak annertutigipput, aningaasat sanaartugassanut atugassiissutigineqartut 52,5 mio. kr. illuartinneqaramik, taakku sanaartukkanut nutaanut, iluarsartuussinernut aammalu kommunip inissiaataanut illuutaanullu oqummik eqqugaasimasunut iluarsartuussinernut atorneqartussaapput, borgmester Kiista P. Isaksenip (S) paasissutissiivoq.
Isumaginnittoqarfik
Missingersuut piviusorsiortoq akuersissutigalugu aalajangiupparput, tamanna pivoq aamma 2017-mi sullissinikkut aammalu aningaasatigut annertuumik unammilligassaqarsimagaluarluta. 2017-mi aningaasaliissutaareersut qaavisigut pingaartumik isumaginnittoqarfimmut ajorseriaateqartitsinngikkaluarluta aningaasaleeqqissinnaasimavugut, borgmesteri tusagassiuutinut nalunaarummi paasissutissiivoq.
Taassuma oqaatigaa kommuni annertuunik anguniaqartoq, kommunilu upernaap ingerlanerani arsaattarfinnik ivigaaraasalersukkanik nutaanik pingasunik pisaarumaartoq. Tamatuma saniatigut borgmesterip pingaartippaa, qinigaaffik qaangiunnerani, ulluunerani meeqqanik paaqqinnittarfiit akisunerpaamik 1000 koruuneqalerumaartut.
Ullumikkut akiliutaasartoq
- Ullumikkut 1.500 kr.-mut killeqqavugut, 2018-mi 1.400 kr.-inngussaaq, qinigaaffimmilu matumani 1.000 kr.-inngoriartuaartissavarput, Kiista P. Isaksen paasissutissiivoq.