isumaqatigiissutit
Kommune Kujalleq: Kujataani angallannermi ajornartorsiutit suli annertupput
Sumi najugaqarneq aallaavigalugu akit assigiinngitsut, nassiussat kigaattut aamma inniminniinermut periaatsit nikerartut. Tamakku immikkoortut borgmesterip Kiista P. Isaksenip uparuartorpai.
Ilaasut angallanneqarneri pillugit Kommune Kujalleq innuttaasunit aamma inuussutissarsiortunit maalaarutinik nassiussiffigineqartuartarpoq.
Norgmesterip Kiista P. Isaksenip (S) maanna saaffiginnissutit ataqatigiissaakkamik katersorneqartarnissaat aallartinniarpaa, Namminersorlutik Oqartussat aamma Disko Line sunnerniarlugit.
- Naak massa ilaasunik angallassinermut kiffartuussinissamut Naalakkersuisut isumaqatigiissutaanut suminermilluunniit Kommune Kujalleq sunniuteqarsinnaanngikkaluartoq, tusarniaanermi akissutigineqartartut aqqutigalugit isummanik anissisinnaaneq eqqaassanngikkaanni, taamaammat isumaqarpunga, kommuni innuttaasut peqatigalugit ilaasunik angallassinermi pissutsit atuutsinneqartut ajornartorsiutinillu nassataqartaqisut pillugit Naalakkersuisunut Inatsisartunullu erseqqissaateqartuarnissaa pissusissamisoorluinnartoq, taanna tusagassiuutinut nalunaarummi allappoq.
Qaninnerusumut timmisartorluni akikinnerusoq
Nanortalik Tourismip Nanortalimmiik Narsarsuarmut timmisartorniaraanni, Qaqortumiit Nanortalik aqqusaarlugu Narsarsualiarniaraanni akikinnerusoq uparuarpaa.
- Pissutsit taamaannerat pillugu Naalakkersuisut akuliuttariaqarput Disko Line A/S-imullu piumasaqaateqarlutik Kujataani angalasut assigiinngitsumik pineqassanngitsut, Kiista P. Isaksen (S) isumaqarpoq.
Nuutsitsiniarnerit itigartitsissutigineqartut
Allat bilitsiminnik allanngortitsisinnaannginnertik maalaarutigaat, piffissaat imaluunniit qulimiguulimmik angallammilluunniit toqqaanissamut tunngatillugu.
- Paarlattuanik Disko Line A/S imminut pisinnaatippoq qanorsuaq ilaasussami angalanissai allanngortitersinnaallugit, tamannalu pisarpoq akiliutit nikingassutaannik ilaasumut utertitsisoqarneq ajortoq, taamaalillutik ilaasut amerlasuutigut helikopterimiit umiatsiamut nuutsitaasarput, patsisaasut paasiuminaakkaluaraangataluunniit.
Nassiussat qaammat ataaseq apuunniartartut
Nioqqutissat timmisartumik tikiussassat, allakkallu aamma sivisuumik tikinniartarnerat, borgmesterip ilanngullugu aamma erseqqissaatigaa.
- Taamaalilluni ullumikkut takornartaanngilaq allagaatit mianernartut, akiligassat allallu allakkat pingaaruteqartut aammalu minnerunngitsumik nioqqutissat silaannakkut apuussassat allaat qaammatip affaa ilivitsorluunniit kinguaattoorunneqarlutik apuunneqartartut.
Kommunip ataqatigiissaakkamik iliuuseqarniarnini piareerpagu, borgmesterip innuttaasunut inuussutissarsiortunullu nalunaarutiginiarpaa. Naalakkersuisut ajornartorsiutit iliuuseqarfigippatigit taanna pisariaarussimanissaa neriuutigaa.
- Pisariaqarluinnarpormi ilaasunik angallassinermi Kujataata naapertuutinngitsumik pineqarnera qaangerniassallugu, taamaammallu isornartorsiutit tusaaginnarnagit aammali ajornartorsiutaasut minnerusut annerusullu aaqqiivigineqarnissaannik sulissuteqartoqarnissaa, Kiista P. Isaksen (S) allappoq.