Kommune Kujalleq

Kommune kinguaassiutitigut atornerluisimanerup kingorna malittarisassaliorpoq

Kommune Kujalleq kinguaasiutitigut atornerluisoqannginnissaa qulakkeerniarlugu najoqqutassiorpoq. Najoqqutassiorneq pivoq maanna Herstedvesterimiittussanngorlugu pineqaatissinneqareersup niviarsiaraq atornerlugajareeraalu

Angut 40-nik ukiulik Qaasuitsumi Eqqartuussivimmit pineqaatissinneqarsimasunut inissiisarfimmut Herstedvesterimut piffissami killeqanngitsumi siorna decembarimi inissinneqartussanngorlugu eqqartuunneqarpoq meeqqat inuusuttuaqqanullu kinguaassiuutitigut atornerluisareersorlu. Angummit taassumannga niviarsiaqqat arnallu 15-nit 21-nut ukiullit atornerlunneqarsimapput kiisalu nukappiaraq qulingiluanik ukiulik aamma kinguaassiuutimigut atornerlunneqarsimalluni.

Angutip eqqartuunneqarneranut atatillugu, taamanikkut unnerluussisussaatitaasoq Tanja Søderlund oqarpoq suliassami pineqartumik ungdomsklubbit, Qeqqata Kommuniata Maniitsumi allattoqarfia kiisalu Kommune Kujalleq sumiginnaasimasut ersertoq.

Maannalu tassa Kommune Kujallermi meeqqanut kultureqarnermullu ataatsimiititaliap suliassaq taanna qanoq iliuuseqarfigisimavaa kinguaasiutitigut atornerluisoqannginnissaa qulakkeerniarlugu najoqqutassiornermigut.

Atuaruk: Angut kinguaassiuutitigut arlaleriarluni atornerluisimanini pissutigalugu pillarneqartoq

Tamanna pivoq angutip 40-nik ukioqartup, nunaqarfimmiillu Iginniarfimmeersup, kujataani ungdomsklubbit ilaannut sianerluni immikkullu uppernarsaatissaqarani niviarsiaraq Aasiannut suliniuteqartuusaarluni aggersarmagu. Niviarsiararli Aasiannut tikinnermini pasitsannermigut angerlartinneqarpoq kujataanut.

- Taamatut pisoqaqqinnginnissaa pinaveersaarniarlugu najoqqutassiorpugut, Kommune Kujallermi meeqqanut kultureqarnermullu ataatsimiititaliap siulittaasua, Siumumeersoq Karla Egede Bisgaard, Sermitsiaq.AG-mut oqarpoq.

Kommune Kujallermit nalunaarutigineqartut naapertorlugit taamatut alajangersagaliornermi pingaanerpaatillugu qulakkeerniarneqarpoq meeqqat – inuusuttuaqqalluunniit - angerlarsimaffiup avataani najugaqarallarnerminni kinguaassiutitigut atornerlunniarneqartannginnissaat.

Atuaruk: Kinguaassiutitigut atornerluisoq pinaveersaartitsinermik ujartuisoq

Aajukua Kommune Kujalliup najoqqutassai nutaat:

  • Aaqqissuussinernut qaaqqusissutit allakkatigut pisassapput. Oqaasiinnarmik qaaqqusinerit itigartinneqartassapput.
  • Uppernarsarneqartassaaq, aaqqissuussisut suliniummik akuerisaasumik sulissuteqartut, soorlu timersornermik peqatigiiffiit, kulturikkut suliniaqatigiiffiit imaluunniit suliniaqatigiiffiit namminersortut kommunilluunniit.
  • Aaqqissuussinermut pilersaarummulluunniit paasissutissamut atatillugu angajoqqaannut saqqummiunneqassaaq aaqqissuussinerup ilumoortuuneranik uppernarsaat.
  • Meeqqat inuusuttuaqqaluunniit peqataanissaanik aalajangiineq angajoqqaaniippoq / angajoqqaatulluunniit oqartussaasumiippoq aamma allakkatigut akuersissutaat pigineqassaaq.
  • Kommune Kujalleq aaqqissuussisuuppat aqqissueqataappalluunniit, kommunip suliniaqatigiiffiulluunniit aaqqissuisuusup pisussaaffigivaa inersimasut aaqqissuinermik akisussaasuusut meeqqanillu aamma inuusuttuaqqanik peqataasunik attaveqartuusut meeqqanut pinerliisimannginnermik uppernarsaateqarnissaat.
  • Kommunip suliffeqarfiini sulisut peqatigiiffiillu ilisimatinneqassapput siunissami qinnuteqaatinik suliaqartarnissamut piumasaqaatinik.

Atuaruk: Inunnik isumaginnittoqarfiup kanngutsaatsuliortanerit pillugit ilisimasai killeqartut

Powered by Labrador CMS