Kommuneqarfik Sermersooq
Kommunalbestyrelsip ataatsimiinnera tv-kut malinnaaffigiuk
Kommuneqarfik Sermersuumi kommunalbestyrelsip ataatsimiittarneranit tullermit kommunalbestyrelsip aalajangiineri oqallinnerallu ajornanngitsumik malinnaaffigilersinnaavatit. Tv-t ikiinnartassavat
Qanittukkut kommunalbestyrelsi angerlarsimaffinnit malinnaaffigisinnaalissavat. Kommuneqarfik Sermersuumi kommunalbestyrelsi aalajangerpoq qanittumi oqartussaaqataaneq ammasuunerlu nukittorsarniarlugit. Sunissami kommunalbestyrelsip ataatsimiinneri toqqaannartumik aallakaatinneqartalissapput, taamaasilluni innuttaasut oqartussaaqataanermik ingerlatsineq qaninnerpaamik malinnaaffigisinnaalissavaat.
Kommuneqarfik Sermersooq tusagassiorfinnut nalunaarutikkut taamatut allappoq.
Oqalliseqataanissamut kajungilersitsissaaq
Borgmesterip erseqqissarpaa innuttaasunut pingaaruteqartoq, inunnut ataasiakkaanut attuumassutilinnut ajornaatsumik paasissaasumillu peqataasinnaanissaat malinnaanissaallu.
– Kommuneqarfik Sermersuumi pingaartipparput ammalluinnartumik ingerlatsinissaq. Tamanna maanna nukittorsassavarput kommunalbestyrelsip ataatsimiinnerisa toqqaannartumik aallakaatittalernerisigut, borgmester Asii Chemnitz Narup (IA) oqarpoq, nangillunilu:
– Kommunerput angisoorujussuuvoq, kissaatigaarpullu innuttaasut tamaasa, sumiluunniit najugaqarluarpata, angunissaat peqataatinnissaallu. Nalunanngilaq amerlasuut kommunalbestyrelsip suliaanik malinnaajuminaatsitsisut.
Kommuneqarfik Sermersuup neriuutigaa malinnaasitsisinnaanerulernikkut siullerpaamik innuttaasut oqallinnernut sulianullu soqutiginninnerat, tamatumalu malitsigisaanik peqataarusussuseqarnerat, annertusineqassasoq.
KNR-mi aallakaatinneqartassapput
Kommunalbestyrelsip ataatsimiinnerata toqqaannartumik aallakaatinneqarnera KNR2-mi malinnaaffigisinnaavat. Siullermik tamanna pissaaq septembarip 29-anni.
KNR2-mi aamma Inatsisartut ataatsimiinneri aallakaatinneqartarput. Ataatsimiinnerit taakkua marluk ataatsikkut pigaangata kommunalbestyrelsip ataatsimiinnera immiunneqartassaaq, Inatsisartullu ataatsimiinnerisa kingorna aallakaatinneqartassalluni. Tamanna siullermik pissaaq septembarip 29-anni.