Kommunalbestyrelsimut ilaasortaq: Martha partiimut nukittorsaataassaaq
Peter Davidsen (S), Kommuneqarfik Sermersuumi kommunalbestyrelsimut ukiuni sisamani ilaasortaasimasoq, naalakkersuisup qanittukkut tunuartinneqartup Martha Lund Olsenip Siumut Nuuk sinnerlugu qinigassanngortinnissamik isumaliutiginninneranik saqqummiussamik nuannaarutiginnippoq
Naalakkersuisut siulittaasuata Kim Kielsenip (S) Kommuninut, Nunaqarfinnut, Isorliunerusunut, Attaveqarnermut Ineqarnermullu naalakkersuisumik Martha Lund Olsenimik, naalakkersuisuuffimmi qaammatingajanni pingasungajaannarni naalakkersuisuusimasumik, tallimanngormat ualikkut tunuartitsinera innuttaasunit tupaallaatigineqaqaaq.
Atuaruk: Kim Kielsen tusagassiortunik aggersaavoq
Kim Kielsenip Martha Lund Olsenimik tunuartitsinerminut tunngavilersuutaa tassaavoq kommuninut qinersinissami Kommuneqarfik Sermersuumi qinigassanngortinniarnera, naalakkersuisoq marlunnik atuuffeqarsinnaanngimmat, naalakkersuisuunerminillu taamaallaat aallussisussaammat.
Atuaruk: Oqaaseqartartoq: Kielsenip Siumumi inissisimanini nukittorsarpaa
Soraarsitsineq qanorluunniit isumaqarfigineqarsinnaavoq, Martha Lund Olsenilli Kommuneqarfik Sermersuumi kommunalbestyrelsimut qinigassanngortikkusunneranik nuannaarutiginnittoq tassaavoq Peter Davidsen (S), Kommuneqarfik Sermersuumi kommunalbestyrelsimut ukiuni sisamani ilaasortaasimasoq.
Atuaruk: Martha: "Taamaammat kommunalpolitikkimut nuulerpunga"
- Uanga nammineq isumannik saqqummiussissaguma isumaqarpunga qinigassanngortinnissaq qinissagaluarpagu tamanna Siumut Nuummut nukittorsaataassasoq. Isumaginninnermut Naalakkersuisutut angusarpassuaqarsimavoq, minnerunngitsumik innarluutillit eqqarsaatigalugit.
- Uatsinut Siumut Nuummiittunut iluaqutaasorujussuussaaq qularinngilaralu peqataassappat qineqqusaarneq pitsannguallatsinneqassasoq. Qinigassanngortissagaluarpat nuannaarutigilluinnassavara, kisianni aalajangereersimanersoq naluara.
- Tamanna nalunaarutiginninnissamut killiliussaq februaarip tallimaa nallertinnagu nammineerluni aalajangertussaavaa, tamannalu Siumut Nuummit naggaterpiaatigut isummerfigineqartussaassalluni, Peter Davidsen oqarpoq.
Peters Davidsenip aamma Martha Lund Olsenip (S) borgmesteritut Asii Chemnitz Narup (IA) unammillersinnaaneranik naliliinerat Sermitsiami atuaruk: