Aappaagu
Københavnimi sapaat ulloq biilerfiunngitsoq
Illoqarfiit pingaarnersaanni Borgerrepræsentationip ippassaq unnukkut akuersissutigaa septembarimi sapaammik biilerfiunngitsumik misiliisoqassasoq
Sapaat biilerfiunngitsoq immaqa 1970-ikkunneerpalaarpoq. Aappaaguli septembarimi sapaat biilerfiunngitsoq atoqqinneqassaaq. Sapaammili ataasiinnarmi.
Københavns Borgerrepræsentationip ippassaq unnukkut akuersissutigaa ulloq ataaseq biilerfiunngitsoq Københavnimi misiliutigalugu atorneqssasoq.
Ulloq taanna 2016-imi septembarimi sapaammi pissaaq, europamilu sapaatip akunneranut angallaffiusumut peqataassalluni.
Københavnimi teknikkimut avatangiisinullu borgmesterip Morten Kabellip (Ø) misiliinissaq qilanaaraa.
– København europami illoqarfissuarnut, misileraasunut illoqarfik biilerfiunngitsoq qanoq atorneqarsinnaanersoq, ilanngussimavoq, taanna oqarpoq.
– Siunertaavoq Københavnimi angalaassasugut Københavnilu misigisaqarfigalugu. Takusinnaassavarput biilernani aqqusineeqqat qanoq isikkoqarnersut, Morten Kabell oqarpoq.
– Illoqarfeqarusuppunga biilimik atuiffiusariaqanngitsumik. Sikkilinik imaluunniit ataatsimut angallassutinik sukkanerusumik ajornaannerusumillu ingerlasoqarsinnaassaaq. Taavalu biilimik isumalluutillit ajornannerujussuarmik ingerlasinnaassapput, Morten Kabell oqarpoq.
Tamatuma saniatigut tikkuarpaa Københavnip silaannaata mingutsinneqarneratigut ukiumut inuit 500-t toqusartut. Morten Kabellilu naapertorlugu tamakkua ikilinavianngillat Københavnimi biilit ikilisanngikkaanni.
Morten Kabellip ilisimanngilaq Københavnimi ulloq biilerfiunngitsoq qanoq akeqassanersoq, ingerlatsivilli naatsorsuusiortippaa ullup ingerlannissaanut periusissat assigiinngitsut qanoq akeqarnissaannik.
Venstre isumaqarpoq ulloq biilerfiunngitsoq innuttaasunut akornutaassasoq.
– Københavnimi ulloq biilerfiunngirtsoq Venstrep akerlerilluinnarpaa. Ukiumut ullorpassuaqareerpoq pisut angisuut pissutigalugu illoqarfiup matoqqasarneranut, assersuutigalugu maratonernermi.
– Suliniut manna politikkimik takussutissiaannaviuvoq, Jens-Kristian Lütken (V), Københavns Borgerrepræsentationimi ilaasortaq oqarpoq.
Europami ilaatigut Bruxelles Parisilu taamatuttaaq suliniuteqarput.