Koda Greenland Awardsimi arlalinnik nersornaasiissaaq

Koda-p erinarsuusiortunut ukiumut qaangiuttumut nersornaasiuttagai ukiumi tullermi januarip naalernerani tunniunneqartalissapput. Aaqqissuusseqqinneq peqqutigalugu 2013-mut aamma 2014-mut nersornaasiussassat ataatsikkoortillugit 2015-mi, 31. januar tunniunneqassapput.

Nersornaasiisartunut ataatsimiititaliap siulittaasua Juaaka Lyberth tusagassiutinut nalunaaruteqarpoq.

Erinniortunut taalliortunullu nersornaasiinerni ukioq mannamut kiisalu ukioq kingullermut nersornaasiisoqassaaq, nipilersortartut kattuffiat peqatigalugu aaqqissuussassami, Katuami Imernalaaq festivaleqarnerani januaarip naanerani.

'Ukioq 2013-mut nersornaat' aamma 'ukioq 2014-mut nersornaat', 2013-14-milu 'isumalluarnartumut nersornaat' kiisalu 2013-14-milu 'ataqqinaammik nersornaat' tunniunneqassapput.

Erinarsuusiortartut nersornaaserneqartussatut siunnersuutit, nersornaatinut tamanut pingasukkaartut aqqi 4. januar 2015 tusarliunneqassapput, Koda ilaasortaminut Katuami ataatsimiisitsilerpat.